Monday, 9 December 2019

بھٹو صاحب نے کہا: نورا انہیں بتاو پہاڑ روتے نہیں ہیں آرٹیکل # 47


Article # 47



بھٹو صاحب نے کہا : نورا ! انہیں بتاو پہاڑ روتے نہیں ہیں


ذوالفقار علی بھٹو کے ذاتی ملازم نور محمد عرف نورا کے حالات و واقعات


تحریر :اظہر عزمی
(ایک اشتہاری کی باتیں)


ضیاء الحق کو جنرل کے رینک پر پروموٹ کر کے چیف آف دی آرمی اسٹاف بنانے کے اعلان کے چند دنوں بعد اسلام آباد میں مقیم ایک امریکی سفارت کار نے جو کہ اردو جانتا تھا، صحافیوں کے ایک گروپ کو بتایا تھا کہ بھٹو کو ایک اور “نورا” مل گیا ہے۔ (حوالہ انگریزی کتاب، پاکستان ضیا اینڈ آفٹر۔۔۔)

نورا کون تھا؟ کیا تھا؟

بھٹو صاحب سے اس کا کیا تعلق تھا؟

وہ وفاداری، جاں نثاری، اطاعت پسندی اور وطن پرستی کے کس منصب

فائز تھا کہ ضیاء الحق کو یہ کہا گیا؟

کیا وہ کابینہ کا کوئی بہت یی با اثر وزیر تھا جس کا Nick Name نورا رکھ دیا گیا تھا جو بعد ازاں Generic بن گیا؟

کیا وہ بھٹو خاندان کے کسی خدمت گار کا بیٹا تھا کہ جس کا بچپن بھٹو صاحب کے ساتھ گذرا ہو؟

یہ سب سوال نورا کی شخصیت تک نہیں پہنچ سکتے۔ کوئی اور کو تو کیا خود نورا ان تک نہیں پہنچ سکتا تھا اگر وہ حیدرآباد سندھ کے میر احمد علی خان تالپور اور میر رسول بخش تالپور کا خاندانی ملازم نہ ہوتا۔ نورا کا اصل نام نور محمد مغل تھا لیکن اسے سب نورا ہی کہا کرتے تھے۔ ایک مرتبہ ذوالفقار علی بھٹو حیدرآباد گئے اور تالپور برادران کے مہمان ہوئے۔ اس کے بعد ان کو جلسہ سے خطاب کرنے سانگھڑ جانا تھا۔ جہاں مخالفین کی جانب سے مزاحمت کا خطرہ تھا۔ تالپور برادران نے اپنے ایک ملازم نورا کو بھٹو صاحب کے ساتھ روانہ کردیا۔ سانگھڑ میں ذوالفقار علی بھٹو پر فائرنگ ہو گئی۔ نورا کمال بہادری کا مظاہرہ کرتے ہوئے ان پر لیٹ گیا اور ان کی جان بچائی۔ ذوالفقار علی بھٹو جہاندیدہ سیاستدان ہونے کے ساتھ ساتھ نظر شناس زمیندار بھی تھے۔ ان میں وفادار و جانثار ملازم کی پرکھ تھی۔ بھٹو صاحب نے تالپور برادران سے نورا کو مانگ لیا اور ان فیاض مزاجوں نے نورا کو ہمیشہ کے لئے ان کے حوالے کردیا۔ بعد میں بھٹو صاحب کی تالپور برادران سے خاصی مخاصمت رہی لیکن نہ تو کبھی تالپور برادران نے نورا کو واپس مانگا اور نہ ہی کبھی نورا نے واپس جانے کی درخواست کی۔

آج کی نئی نسل شاید تالپور برادران سے واقف نہ ہو۔ میر احمد علی خان تالپور بڑے جبکہ میر رسول بخش تالپور چھوٹے بھائی تھے۔ رسول بخش تالپور بھٹو دور میں گورنر سندھ اور سینئر وزیر بھی رہے۔ ان سے متعلق مشہور ہے کہ جس روز وہ گورنر کے عہدے سے مستعفی ہونے تو یہ کہتے ہوئے گئے کہ میں آج کوفہ چھوڑ کر جارہا ہوں۔ بڑے بھائی میر احمد علی خان تالپور ضیا دور میں وزیر دفاع تھے۔ کسی نے پوچھا کہ آپ کو وزیر دفاع کیوں بنایا تو بولے کیونکہ پوری کابینہ میں سب بڑی مونچھوں میری ہیں۔ ابتدا میں یہ پیپلز پارٹی میں تھے۔ رسول بخش تالپور سندھ میں پارٹی چیئرمین تھے۔ بعد ازاں اختلافات ہوگئے جو ہمارے ہاں جمہوریت کا حسن ہیں۔

تالپور برادران کی پیپلز پارٹی سے وابستگی اور نور محمد نورا کی ذوالفقار علی بھٹو کو حوالگی سے متعلق جناب حسن مجتبی اپنے مضمون پی پی پی کے 45 سال، بھٹو سے زرداری میں لکھتے ہیں:

” اگرچہ پاکستان پیپلزپارٹی کی بنیاد لاہور میں رکھی گئی تھی لیکن بہت کم لوگوں کو یاد ہوگا کہ اس کا اصل جنم حیدرآباد سندھ میں ٹنڈو میر محمود میں المعروف میر برادران میر رسول بخش تالپور اور میر علی احمد تالپور کی رہائش گاہ پر ہوا تھا جب 16 ستمبر1967ء کو ذوالفقار علی بھٹو نے ایک پریس کانفرنس کے دوران اعلان کیا تھا کہ وہ نئی پارٹی بنانے جا رہے ہیں جس کا اعلان لاہور کنونشن میں کیا جائے گا۔ میر برادران نے ہی اپنے دیرینہ اور بااعتماد ملازم نور محمد مغل جو کہ نورا کے نام سے مشہور ہے کی خدمات ذوالفقار علی بھٹو کے حوالے کی تھیں، نورا اس دن کے بعد اپنے آخری دنوں تک بھٹو کا ہی وفادار کہلایا۔ یہ نورا تھا جس نے پاکستان پیپلزپارٹی کے منشور کی کاپیاں بوریاں بھر کر بذریعہ خیبر میل ملک کے کونے کونے میں جاکر پہنچائی تھیں۔ بھٹو کا یہ انتہائی قریبی اور معتمد ملازم خاص جنرل ضیاء کی آمریت کے ابتدائی سالوں میں کراچی میں مردہ پایا گیا۔”

نور محمد نورا کی اہمیت و حیثیت کا اندازہ صرف اس بات سے لگایا جا سکتا ہے کہ اگر ذولفقار علی بھٹو سو رہے ہوں تو ماسوائے نورا کسی کو اجازت نہ تھی کہ وہ ان کو نیند سے بیدار کرے۔ نور محمد نورا کی میڈیائی شہرت کا آغاز کراچی کے ایک جلسہ سے ہوا۔ واقعہ کچھ یوں ہے جس روز بھٹو صاحب کو کراچی میں ایک جلسہ عام سے خطاب کرنا تھا۔ اس روز ایک اخبار میں یہ خبر شائع ہوئی کہ رات وزیر اعظم کسی بات پر آبدیدہ ہوگئے یا رو پڑے۔ بھٹو صاحب نے جلسہ سے خطاب کرتے ہوئے اس خبر کا حساب نورا کو مخاطب کرتے ہوئے چکتا کیا اور کہا:

نورا ! انہیں بتاو پہاڑ روتے نہیں ہیں۔

جلسہ تو ختم ہو گیا مگر اتنے بڑے جلسہ میں نورا کا یہ تعارف سب کو چونکا گیا۔ اب نور محمد نورا کا مرتبہ پیپلز پارٹی کے بڑے بڑ رہنماوں کے برابر ہوچکا تھا۔

نورا محض وفادار و جانثار ہی نہیں تھا۔ وہ زہین، حاضر دماغ اور زمانہ آگاہ تھا۔ وہ اپنے صاحب کے آبرو کے اشاروں کو سمجھنے کے ساتھ ساتھ وہ ان کے ذہن کو بھی پڑھ لیتا تھا۔ بڑے بڑے بیوروکریٹس ذوالفقار علی بھٹو سے ملنے سے قبل نورا سے ملتے اور متعلقہ مسئلہ بتانے کے بعد پوچھتے کہ اس بات کے لئے وزیر اعظم کا موڈ اس وقت کیسا ہے؟ نورا بھٹو صاحب کا تو مزاج داں و نبض شناس تھا ہی اس کے ساتھ ملاقاتیوں سے متعلق بھٹو صاحب کیا رائے رکھتے ہیں۔ اس سے بھی اچھی طرح واقف تھا۔ وہ جانتا تھا کہ صاحب کی تیوریاں کسے دیکھ کر چڑ جاتی ہیں اور کسے دیکھ کر خوشگواری آجاتی ہے۔ نورا یہ بھی جانتا تھا کہ سیاست میں کوئی چیز حرف آخر نہیں ہوتی۔ صاحب آج جس سے ناخوش ہیں کل اس سے خوش بھی ہوسکتے ہیں۔اس لئے وہ موجودہ معاملات و حالات اور مستقبل بینی کے ساتھ متعلقہ شخص کے حفظ مراتب کا بھی خیال رکھتا تھا۔ اور وہ ایسا کیوں نہ کرتا؟ بھٹو صاحب جیسا شخص اگر کسی عام سے آدمی کو اتنا اختیار دے رہا ہے تو اس میں کوئی خاص بات تو ہوگی۔

نور محمد نورا ذوالفقار علی بھٹو کے ساتھ ہی رہتا حتی کہ غیر ملکی دوروں تک میں ان کے ہمراہ ہوتا اور جہاز کی اکنامی کلاس میں سفر کرتا۔ ہر کوئی اس کے ساتھ عزت و احترام سے پیش آتا۔ ہر کوئی اسے نورا صاحب کہہ کر مخاطب کرتا۔ بھٹو صاحب کو اگر دورے میں کسی شخص کو خاص اہمیت دینا یوتی تو نورا سے ان کا خیال رکھنے کو کہہ دیتے۔

مشہور صحافی اور کالم نگار جناب عبدالقادر حسن اپنے ایک کالم ’’بیش قیمت دوست اور بیش قیمت زیورات‘‘ میں رقم طراز ہیں:

“بھٹو خاندان کے بارے میں جب بھی ناگوار خبریں ملیں مجھے بہت دکھ ہوا کیونکہ بھٹو صاحب میرے مہربان تھے وہ جب حزب اقتدار میں آئے تو انھوں نے بڑی عجلت میں کوئی نو ملکوں کے دورے کیے۔ صبح کہیں دوپہر کہیں اور رات کہیں۔ میں اپنے اخبار کی طرف سے اس یاد گار دورے میں شامل تھا۔ بھٹو صاحب سے آمنا سامنا ہوتا رہتا تھا۔ کالے رنگ کی ایک صندوقچی ہر وقت اٹھائے ہوئے ان کا خاص ملازم نور محمد عرف نورا جو ہر وقت ان کے آس پاس رہتا تھا اسے بھٹو صاحب نے ہدایت کی تھی کہ وہ میرا خیال رکھے۔”

بھٹو کابینہ کے قدآور وزراء جو ناک پر مکھی نہیں بیٹھنے دیتے تھے جب بھٹو صاحب کے پاس آتے تو نورا کے پاس بیٹھتے، حال احوال لیتے اور اگر یہ سمجھتے کہ وزیر اعظم اس وقت نہ سہی کسی اور وقت ان کے مسئلے کو مثبت انداز سے دیکھیں گے تو مسئلہ نورا کے گوش گذار کر جاتے یا فائل ہی وہیں رکھ کر چلے جاتے۔اب یہ نورا پر منحصر ہوتا کہ وہ فائل یا مسئلہ کب صاحب تک پہنچائے۔

نور محمد نورا کا تذکرہ اس کے نام کے ساتھ سیاست دانوں کی کتابوں میں مل جاتا ہے جس سے اندازہ ہوتا ہے کہ وہ اپنے عہد عروج میں کتنا قابل ذکر رہا ہے۔ ملک حاکمین خان اپنی کتاب ’خار زار سیاست کے شب و روز‘‘میں ذوالفقارعلی بھٹو کے حوالے سے لکھتے ہیں:

“ذوالفقار علی بھٹو سے ان کی پہلی ملاقات 1970ء کے انتخابات میں ایم پی اے منتخب ہونے کے بعد انٹر کانٹی نینٹل ہوٹل راولپنڈی میں اپنی پہلی ملاقات کا احوال بتاتے ہیں کہ بھٹو صاحب سے ملاقات کے بعد جب میں واپس جانے کے لیے ہوٹل کی لابی میں ڈرائیور کا انتظار کر رہا تھا کہ اس دوران بھٹو صاحب کا ملازم خاص نور محمد عرف نورا مغل دوڑتا ہوا آیا اور مسکراتے ہوئے مجھے مبارکباد دی اور بتایا کہ بھٹو صاحب نے غلام مصطفی کھر سے کہا کہ دنیا کا ہر انسان بے وفا ہو سکتا ہے لیکن یہ نوجوان کبھی بے وفائی نہیں کرے گا۔ میں اس نوجوان کی آنکھوں میں وفا دیکھ رہا ہوں۔ یہ بات وقت اور تاریخ ثابت کرے گی”۔ یہ بات بعدازاں فوٹو گرافر اور مصطفی کھر نے بھی بتائی۔”

وقت سدا ایک سا نہیں رہتا۔ بھٹو صاحب اقتدار سے ہٹا دیئے گئے اور ملک میں مارشل لاء نافذ ہوا تو اس وقت کی حکومت نے احتساب کا آغاز کر دیا اور غیر ملکی دوروں میں ملنے والے تحائف تک پر مقدمات قائم کر دیئے گئے۔ ایک قیمتی فانوس کو اپنے ذاتی گھر میں سجانے پر بھی مقدمہ بنا دیا گیا۔ یہاں بھی نور محمد نورا سمیت ذاتی ملازموں کو وعدہ معاف گواہ بنانے کی حتی المقدور کوشش کی گئی مگر کامیابی نہ ملی۔

4 اپریل 1979 کو ڈوالفقار علی بھٹو کو ٹختہ دار کے حوالے کر دیا گیا۔ جس کی آنکھوں کے آبرو کے اشارے نورا کے لئے لفظوں کا کام دیا کرتے تھے۔اب وہ دنیا سے آنکھیں موند کر منوں مٹی تلے جا سویا تھا۔ اس کے بعد نورا کی کوئی خبر نہ آئی۔ میڈیا بھی بھلا بیٹھا۔ پھر ایک دن نورا خبر بن گیا۔ ایک ایسی خبر جو وہ خود نہیں دے سکتا تھا۔اس کے اپنے مرنے کی خبر۔ خبر کے مطابق فیڈرل بی ایریا کراچی میں نصیر آباد پر واقع ایک فلیٹ میں نورا کی پر اسرار موت واقع ہوگی۔ کسی نے کچھ کہا تو کسی نے کچھ۔ اچھا ہوا وہ بھٹو صاحب کا ذاتی ملازم تھا، پڑھا لکھا نہیں تھا، پارٹی لیڈر نہیں تھا ورنہ جو کچھ اس کے سینے میں تھا اگر وہ اپنی سوانح عمری میں لکھ دیتا تو کتنے راز طشت از بام ہو جاتے، کتنے چہرے بے نقاب ہوجاتے۔

ذوالفقار علی بھٹو نے صحیح کہا تھا:

“نورا ! انہیں بتاو پہاڑ روتے نہیں ہیں۔”

کوئی لاکھ اپہاڑ واقعی نہیں روتے مگر پہاڑ کے ساتھ کھڑے لوگ پھوٹ پھوٹ کر روتے ہیں۔ کوئی نور محمد نورا سے پوچھتا اگر وہ زندہ ہوتا

Monday, 2 December 2019

وزیر اعلی پنجاب عثمان بزدار ۔ اپنی خوشی سے آئے نہ اپنی خوشی چلے ۔آرٹیکل # 46



Article # 46

عثمان بزدار: اپنی خوشی سے آئے نہ اپنی خوشی چلے



متعلقہ تصویر


تحریر: اظہر عزمی

(ایک اشتہاری کی باتیں)
دلی کے آخری ظلِ الہی، خلد آشیانی (لیکن اس سے پہلے رنگون مکانی) بہادر شاہ ظفر اپنے محل میں استاد ابراہیم ذوق کے ساتھ شعری گتھیاں سلجھانے میں مصروف ہیں۔ دوسری طرف سرکار انگلیشیہ ان کی دست برداری اور قیدوبند کے لئے پُرکارو ریا کار منصوبہ ترتیب دے رہی ہے۔ پوری سلطنت کے وجود کا قافیہ تنگ ہو رہا ہے مگر مغل شاہی کے آخری فرماں روا اور پہلے باضابطہ شاعر بہادر شاہ ظفر اپنے استاد کے ساتھ شعری اوزان تول رہے ہیں۔ اس دوران ایک شہزادہ کورنش بجاتے ہوئے داخل ہوتا ہے اور ایک رقعہ بہادر شاہ ظفر کو دے کر واپسی کی راہ لیتا ہے۔ اتنی جلدی آنے اور پھر جانے پر کچھ کہا جاتا ہے جس پر شہزادہ آداب شاہی اور مزاجِ ظفری کو ملحوظ خاطر رکھتے ہوئے کہتا ہے:
اپنی خوشی سے آئے نہ اپنی خوشی چلے
بہادر شاہ ظفر شہزادہ کے جانے کے بعد استاد سے اس جملے پر جو کہ بھرپور مصرعہ ہے کلام کی فرمائش کرتے ہیں۔ اب بادشاہی چاھے دلی کے محل تک ہی محدود کیوں نہ رہ گئی ہو اور اس ابتلا کے دور میں بھی بادشاہ شعر وسخن سے غافل نہ ہو تو پھر اتنا تو حق بنتا ہے کہ بات ٹالی نہ جائے۔ ویسے بھی استاد ذوق کو کون سے لشکر کی سپہ سالاری دی گئی تھی جس کام پر رکھا گیا تھا وہ تو کرنا ہی تھا۔
استاد رواں ہوتے ہیں، غزل ہوتی ہے جو آج بھی ذوق سے پڑھی جاتی ہے۔
لائی حیات آئے، قضا لے چلی چلے
اپنی خوشی سے آئے نہ اپنی خوشی چلے
غزل کا یہ مطلع پہلے دلی اور اب وزیر اعلیٰ پنجاب عثمان بزدار کی سیاسی زندگی کو وزارتِ اعلیٰ سے مائل بہ غروب کرنے کی سرخی بنتا جا رہا ہے۔
محسن بھوپالی کا یہ شعر پاکستانی سیاست میں ضرب المثل کی حیثیت اختیار کر چکا ہے:
نیرنگیِ سیاست ِ دوراں تو دیکھئے
منزل انہیں ملی جو شریک ِ سفر نہ تھے
2001 میں مسلم لیگ (ق) سے سیاسی زندگی کی اننگ کھیلنے والے عثمان بزدار ق والوں کے کاندھوں پر بیٹھ کر ڈسٹرکٹ ناظم تونسہ شریف بنے اور 2008 تک اس پر متمکن رہے۔ بعد ازاں سناہے وہ فارورڈ بلاک کا حصہ بن گئے لیکن کچھ واقفان ِحال کہتے ہیں کہ وہ 2011 تک مسلم لیگ (ق) میں رہے۔ یہاں ایک بات تو ثابت ہوتی ہے کہ مزاج وہی روایتی سیاست دانوں والا ہے کہ جب تک اقتدار ہے ہم ساتھ ہیں۔ 2013 میں ہوائوں کا رخ دیکھا تو مسلم لیگ (ن) کے ہولئے اور پہلی بار صوبائی اسمبلی کی ایک نشست پر جا بیٹھے۔
2018کے انتخابات قریب ہوئے تو عثمان بزدار مسلم لیگ (ن) سے دور ہونے کے لئے پر تولنے لگے۔ جنوبی پنجاب کے سیاسی طبقہ اشرافیہ نے پھر جنوبی پنجاب میں عوام کے ساتھ ناانصافیوں کا راگ الاپا اور جنوبی پنجاب صوبہ محاذ کھول دیا۔ عثمان بزدار فوراً اس گاڑی میں سوار گئے۔ تحریک انصاف نے عوام کے دکھ میں مبتلا ان سیاسی خانہ بدوشوں کو گلے لگایا اور ایک دن جنوبی پنجاب صوبہ محاذ تحریک انصاف میں ضم ہوگیا۔انتخابات ہوئے اورعثمان بزدار صوبائی اسمبلی کے دوبارہ رکن بن گئے۔
پنجاب کی وزارت ِ اعلیٰ کے لئے کون کون کب سے اور کس کس طرح کوششوں میں لگا تھا۔ کوئی پانی کی طرح پیسہ بہا رہاتھا۔ کوئی اپنی وفاداری کے لئے ہر جتن کر رہاتھا۔ جس کو دیکھو پارٹی سربراہ عمران خان سے ملنے دوڑا چلا جا رہا ہے اورآ تے ہی اقتدار کے مرض میں مبتلا ہونے کی خاطر اپنی مرضی کی خبریں اور ٹاک شوز میں پھلجڑیاں چھڑوا رہا ہے۔ عمران خان مل سب سے رہے تھے مگر دل میں کیا ہے۔ وہ کسی کو نہیں بتا رہے تھے۔ ایک دن عثمان بزدار کو بلایا۔ انٹرویو لیا اور واپس بھیج دیا۔ یہ بھی خاموشی سے آکر بیٹھ گئے۔
17اگست2018کو عمران خان نے وزارت اعلیٰ کا قرعہ عثمان بزدار کے نام نکال دیا۔اس خبر پر اپنے تو اپنے غیر بھی حیران تھے۔ شنید ہے کہ عثمان بزدار کو لانے میں عمران خان کو گھرسے بھی غیبی اشارے کا بتایا گیا تھا۔ اس لئے ہم بلا شک وشبہ کہہ سکتے ہیں کہ:
اپنی خوشی سے آئے نہ۔۔۔
بہت سمجھایا گیا کہ ابھی شہباز شریف وزارت کی جو لمبی اننگ کھیل کر گئے ہیں اور تمام تر تنقیدکے باوجود ان کے چوکے چھکے پنجاب خاص کر لاہور شہر میں نظر آتے ہیں۔ یہ ابھی بہت نئے کھلاڑی ہیں۔ ڈسٹرکٹ لیول سے آگے ان کی روڈ جاتی ہی نہیں ہے، انہیں پنجاب کا کپتان بنانا سیاسی خود کشی سے زیادہ کچھ نہیں۔ لاہور مسلم لیگ (ن) کا ہوم گرائونڈ ہے، یہاں قدم قدم پر ان کے چاھنے والے موجود ہیں۔ سیاست میں اپنے کام کے لوگوں کو نواز کر وہ ہر جگہ، ہر مقام پر قدم جمائے اور دانت گاڑے بیٹھے ہیں۔ سب نیک و بد سمجھا یا گیا مگر عمران خان نے ایک قدم آگے بڑھ کر عثمان بزدار کو وسیم اکرم پلس کہہ کر بات ہی ختم کردی لیکن یہ عمران خان کا خیال تھا۔ کھیل اب شروع ہوا تھا۔ یہ پنجاب کی سیاست کے واحد وزیر اعلیٰ ہیں کہ جن کو اپنی پارٹی لے لوگ روزِ اول سے لاہور بدر کرنے کے چکر میں لگے ہیں اور مخالفین چاھتے ہیں کہ وہ وزارت پر رہیں۔ کپتان اور اوپننگ بیٹسمین ہی جب ہلکا ہوگا تو ٹیم کا مورال کیا رہے گا، اسکور بورڈ پر کیا لکھا ہوگا اور ہوا بھی یہی۔
وزیر اعظم عمران خان ڈٹے رہے مگر اب صورتِ حال تبدیل ہو رہی ہے. ایک جلسہ میں انہوں نے پنجاب اورکے پی کے میں بیٹنگ آرڈر تبدیل کرنے کی خبر سنا دی ہے۔
صورت ِ حال تو شروع دن سے مسلم لیگ(ق) کے رحم و کرم پر ہے۔ سب جانتے ہیں کہ پنجاب میں مسلم لیگ (ن) کی 166 جبکہ تحریک انصاف کی 181 نشستیں ہیں۔ حکومت بنانے کے لئے 185ووٹوں کی ضرورت تھی۔ اگر مسلم لیگ(ق) 10 کی گنتی پوری نہ کرتی تو تحریک انصاف پنجاب کی وزارت اعلیٰ کا منہ دیکھتی رہ جاتی۔ پچھلے دنوں مولانافضل الرحمن کے دھرنے کو لپیٹنے میں اہم کردار چوہدری پرویز الہی کا رہا ہے۔ مولانا فضل الرحمن اتنی آسانی سے ماننے والے نہیں تھے۔ وہ تو کچھ کئے بنا محنتانہ وصول کر لیتے ہیں۔ اس بار تووہ زندگی میں پہلی بار 73″کے آئین کے تناظرمیں” میں تن تنہا باہر نکلے تھے جس کی وہ آنے والے وقتوں میں اچھی خاصی قیمت وصول کریں گے جس کی پہلے قسط کے BENEFICIARY میں پرویز الہی کا نام ِ نامی بھی سننے میں آرہاہے۔
سیاسی تجزیہ نگار تو یہ بھی کہہ رہے ہیں کہ عثمان بزدار کی روانگی کے بعد قرعہ فال چوہدری پرویز الہی کے نام نکل سکتا ہے۔ وجوہات کوئی ایک نہیں۔پنجاب کے وزیر اعلیٰ رہ چکے ہیں۔ بیورکریسی کے حربوں کو جانتے ہیں۔ سیاست میں کہاں سونے کا نوالہ کھلانا ہے اور کہاں شیر کی نظر سے دیکھنا ہے۔ ان کے سیاسی اوصاف حمیدہ میں شامل ہیں۔ حکومتی جماعت کے لئے یہ سب قبول کرنا اتنا آسان نہیں۔ اسمبلی میں 181 نشستوں اور اپنے لوگوں کی طویل فہرست ہوتے ہوئے پوری پلیٹ کسی اور کو دے دینا کہاں کی سیاست ہے؟ پارٹی سے اس وقت علیم خان مضبوط امیدوار ہیں۔ نام تو ڈاکٹر یاسمین راشد کا بھی سننے میں آرہا تھا۔ عمران خان دوسری بار بھی جنوبی پنجاب کی طرف دیکھ رہے ہیں اور نظر انتخاب پڑ رہی ہے پنجاب کے وزیر ہاشم جواں بخت پر جو کہ وفاقی وزیر خسرو بختیار کے بھائی ہیں۔
وزیر اعلیٰ کی تبدیلی کا یہ عمل ہو جانے پر یہی کہا جاسکتا ہے کہ دوسروں کے تجربہ سے فائدہ اٹھانے کے لئے بھی تجربہ کی ضرورت ہوتی ہے جو سیاست میں بہت ضروی ہے۔عثمان بزدار کو نہ تو وزارت میں لاتے وقت پوچھا گیا اور جب ان کی روانگی کی بوگی پلیٹ فارم پر آلگی ہے تو کوئی ان کی طرف پلٹ کے بھی نہیں دیکھ رہا ہے۔ جب یہ بے دست و پائی ہوگی تو یہی کہا جائے گا:
اپنی خوشی سے آئے نہ اپنی خوشی چلے

Sunday, 24 November 2019

یااللہ ، یا رسول ۔۔۔۔۔ بے نظیر بے قصور ، یہ نعرہ ہے کسں کا ؟ آرٹیکل # 45


Article # 45

یا اللہ ، یا رسول ۔۔۔ بے نظیر بے قصور

یہ دعائیہ نعرہ پہلی دفعہ کس کے لئے لگایا گیا؟



تحریر: اظہر عزمی
(ایک اشتہاری کی باتیں)
پاکستانی سیاست نعروں سے بھری ہے۔ پاکستان جیسے ممالک کہ جہاں سیاست شخصیات کے گرد گھومتی ہے۔ اس لئے عموما نعروں میں شخصیات ہی نمایاں ہوتی ہیں۔ ترقی یافتہ ممالک میں خاص طور پر انتخابات کے موقع پر ایک حکمت عملی وضع کرنے کے بعد سلوگنز (نعرے) دیئے جاتے ہیں۔ ہمارے ہاں اب کسی حد تک اس طرف دھیان دیا جا رہا ہے جو کہ خوش آئند بات ہے۔
ہمارے نعروں میں معنویت سے زیادہ عوامیت کا پہلو ہوتا ہے اور اسی لئے اکثر نعرے بہت زیادہ بامعنی نہیں ہوتے ہیں مگر عوامی جذبات کے آئینہ دار ہوتے ہیں۔ پاکستان میں نعروں کی بھی اپنی ایک پوری تاریخ ہے جس کا احاطہ اس مضمون میں ممکن نہیں۔ میں چند ایک چنیدہ چنئدہ نعروں کے بعد نفس مضمون پر آجاوں گا جو کہ اس مضمون کی سرخی سے آشکار ہے۔
نعرے کبھی کبھی خود ہی بن جاتے ہیں، زبان زد عام ہو جاتے ہیں۔ عوامیت کسی بھی نعرے کا حسن ہوتی ہے۔ یہی وجہ ہے کہ وہ ہمارے عوام کے دل کو چھو جاتے ہیں، دلوں کو گرما جاتے ہیں۔ کبھی نظم کا کوئی مصرعہ نعرہ بن جاتا ہے تو کبھی روانی میں کسی کے منہ سے نکلی کوئی بات۔ حبیب جالب کے کتنے مصرعے نعروں کے قالب میں ڈھل چکے ہیں جیسے:
ایسے دستور کو صبح بے نور
میں نہیں جانتا میں نہیں مانتا
لاڑکانے چلو ورنہ تھانے چلو
گرتی ہوئی دیواروں کو ایک دھکا اور دو
ڈرتے ہیں بندوقوں والے ایک نہتی لڑکی سے
دلچسپ بات یہ ہے کہ جس طبقہ کے خلاف انہوں نے لکھا آج وہی اشعار اور نعرے ان کی مائیک توڑ تقریروں کا لازمی جزو ہیں۔
جس طرح فلم میں کبھی گانے ہی کامیابی کا سبب بن جاتے ہیں۔ اسی طرح پاکستانی سیاست میں نعرے گانوں کی سی حیثیت رکھتے ہیں۔ بڑے بڑے لیڈر ایک اچھے نعرے کو ترستے ہیں۔ بڑی کوششیں ہوتی ہیں جیسے کہ میاں نواز شریف کو اپنی پوری زندگی میں عوامی مقبولیت کا صرف ایک نعرہ مل سکا:
قدم بڑھاو! نواز شریف ہم تمھارے ساتھ ہیں
جس پر میاں صاحب نے ایک بار ازراہ تفنن کہا تھا کہ میں نے پیچھے مڑ کر دیکھا تو کوئی بھی نہیں تھا۔ اس نعرے کا مخالفین کی طرف سے جوابی نعرہ بھی آیا۔ رقم لگاو! نواز شریف ہم تمھارے ساتھ ہیں۔ خیر سیاست میں یہ چھیڑ چھاڑ کوئی نئی نہیں۔
1970 میں پیپلز پارٹی نے جماعت اسلامی کے انتخابی نشان ترازو پر اس نعرے میں بھپتی کسی تھی:
تھک گئی گردن کٹ گیا بازو، ہائے ترازو ہائے ترازو
جس پر جماعت اسلامی نے جوابی وار کرتے ہوئے کہا تھا:
لاو ترازو تول کے دیکھو، ساڈا پلہ بھاری ہے۔
1965 کے انتخابات میں جب مادر ملت محترمہ فاطمہ جناح کا انتخابی نشان لا لٹین اور ایوب خان کا پھول تھا تو ان دنوں دیواروں پر یہ لکھا دیکھا گیا:
ایک شمع جلی جل جانے کو ، ایک پھول کھلا مر جانے کو
ایوب خان کے لئے یہ نعرے لگایا گیا۔
ملت کا محبوب، ایوب ایوب —– صدر ہوگا کون ؟ ایوب ایوب
1977 کے انتخابات میں نعرے ذاتیات پر اتر آئے:
گنجے کے سر پر ہم چلے گا —– گنجا سر کے بل چلے گا
خیر اس سے پہلے ایوب خان کی روانگی کے وقت بھی ایک چارلفظی نعرہ بہت مشہور ہوا تھا جس کے آخری دو لفظ ہائے ہائے تھے۔
جنرل ضیا کے لئے مرد مومن، مرد حق کا نعرہ آیا۔ جب جنرل ضیا الحق نے بھٹو صاحب کو فارع کیا تو ان کی تلوار کٹ مونچھوں کو دیکھتے ہوئے یہ نعرہ بھی سنا گیا:
ہل آیا نہ آئی تلوار —– آگئی مونچھوں والی سرکار
جنرل ضیا کی امریکا نواز پا لیسیوں پر یہ نعرہ مقبول ہوا
امریکا کا جو یار ہے۔ ۔ غدار ہے غدار ہے۔
اس کے علاوہ جنرل ضیا الحق کو سرمہ والی سرکار اور بینڈ ماسٹر بھی کہا گیا۔ ان ہی کے زمانے میں ایک ملی نغمہ کو سیاسی کارکنوں نے تبدیل کردیا:
تیرا پاکستان ہے نہ میرا پاکستان ہے —- یہ اس کا پاکستان ہے جو صدر پاکستان ہے
پیپلز پارٹی نے ضیا دور میں اپنی سیاسی بقا کے لئے طویل جد و جہد کی اور نہایت جذباتی نعروں کی فراوانی ہوئی۔ ان میں ایک نے بہت شہرت پائی:
تیرے قاتل زندہ ہیں —- بھٹو ہم شرمندہ ہیں
جب تک بھٹو کے قاتل زندہ رہے تو یہ نعرہ سنائی نہ دیا:
کل بھی بھٹو زندہ تھا —- آج بھی بھٹو زندہ ہے
بھٹو کے قاتل نہ رہے تو پیپلز پارٹی نے آج اور کل میں بھٹو کے زندہ ہونے کا نعرہ لگا دیا۔ سندھ میں پیپلز پارٹی کی حکومتی کارکردگی نے پیپلز پارٹی کی ساکھ کو جو نقصان پہنچایا ہو وہ اپنی جگہ لیکن مخالفین نے بالخصوص سوشل میڈیا پر جس طرح اس نعرے کو بطور طنز استعمال کیا ہے، وہ خود اس نعرے پر سوالیہ نشان بن گیا ہے۔
جنرل ضیا الحق نے انتخابات نہ کرانے کے لئے سو سو بہانے تراشے۔ آئے دن کوئی نہ کوئی شوشہ چھوڑ دیا جاتا اور قوم کو ٹرک کی بتی کے پیچھے لگا دیا جاتا۔ ایک زمانے میں پہلے “احتساب پھر انتخاب” کی پھلجڑی چھوڑی گئی۔ ان کا نام تو ضیا تھا مگر ان کا دور جمہوریت کا تاریک ترین دور تھا۔ اس دور میں پیپلز پارٹی نے وہ کچھ سہا کہ تپ کر کندن بن گئی مگر افسوس کہ بعد میں یہ کندن صرف اقتدار کی غلام گردشوں میں اقتدار طلبی کے لئے استعمال کیا جاتا رہا اور دام بھی انہوں نے وصولے جو اس وقت شریک سفر نہ تھے اور یوں ذوالفقار علی بھٹو کے تمام نعرے زمیں بوس کر دئیے گئے۔
1988 میں مسلم لیگ نواز نے پہلی بار اعلانیہ صوبائیت کا نعرہ دیا:
جاگ پنجابی جاگ
تیری پگ نوں لگ گئی آگ
1986 میں شریف النفس اور جمہوریت پسند وزیر اعظم محمد خان جونیجو نے جنرل ضیا الحق کی تمام تر چابک دستیوں کے باوجود محترمہ بے نظیر بھٹو کو پاکستان آنے کی اجازت اور کوئی رکاوٹ نہ ڈالنے کی یقین دہانی کرا دی۔ میرا ذاتی خیال ہے کہ جونیجو کا یہ جرات مندانہ فیصلہ پاکستان پیپلز پارٹی کے بڑے بڑے رہنماوں کی قربانیوں سے کہیں زیادہ اہمیت اور دور رس نتائج کا حامل رہا۔ وجہ کچھ بھی ہو پیپلز پارٹی کی سیاست واپسی کی راہ جونیجو کے اس فیصلے سے جڑی ہے۔ جب محترمہ بے نظیر بھٹو نے لاہور میں قدم رکھا تو تاریخ بن گئی۔ شہر لاہور کیا پورا ملک اس نعرے سے گونج اٹھا۔
جب تک سورج چاند رہے گا —- بھٹو تیرا نام رہے گا
جنرل ضیا الحق ایک حادثے میں راہی ملک عدم ہوئے اور یکم دسمبر 1988 کو بے نظیر بھٹو نے وزیر اعظم کے عہدے کا حلف اٹھایا لیکن وہ عہدے پر مقررہ مدت تک فائز نہ رہ سکیں اور صدر غلام اسحق خان کے ایک دستخط سے جاری ہونے والے پروانے نے ان کی حکومت کو برطرف کر دیا اور پھر پاکستان کی تاریخ کا پہلا دعائیہ اور التجائیہ نعرہ سامنے آیا:
یا اللہ یا رسول، بے نظیر بے قصور
میں اب اس نعرے سے آگے جانا نہیں چاھوں گا کیونکہ یہ نعرہ ہی میرے حاصل مضمون ہے۔
یہ نعرہ سب سے پہلے کہاں اور کس کے لئے لگایا گیا؟
جب محترمہ بے نظیر بھٹو کی پہلی حکومت آئی تو محترمہ اپنے آبائی شہر لاڑکانہ ایک تقریب میں شرکت کے لیے گئیں۔ اس وقت سندھ پیپلز اسٹوڈنٹس فیڈریشن دو حصوں میں تقسیم تھی جس میں ایک کی قیادت امیر بخش عمرانی کر رہے تھے۔ تقریب میں ان کے گروپ کو مدعو نہیں کیا گیا۔ اس موقع پر امیر بخش عمرانی گروپ کے اسٹوڈنٹس اسٹیج پر چڑھ دوڑے اور انہوں نے یہ نعرہ لگایا:
یا اللہ یا رسول، عمرانی بے قصور
کسی کو کیا پتہ تھا کہ جب محترمہ بے نظیر بھٹو کی پہلی حکومت نہ رہے گی تو یہ پاکستانی کی سیاسی تاریخ کا پہلا نعرہ ہوگا جس میں خدا اور رسول (ص) سے فریاد، التجا اور انصاف کی دھائی دی جائے گی۔ محترمہ اسلام آباد سے گھر لوٹیں تو یہ نعرہ اب ایک نام کے رد و بدل سے دلوں میں گھر کرتا چلا گیا
یا اللہ یا رسول، بے نظیر بے قصور
نعرے میں عجیب پکار تھی جو اس سے پہلے کسی نعرے میں نظر آئی نہ محسوس ہوئی۔ پیپلز پارٹی پر ہونے والے تمام مظالم کی ترجمانی اس نعرے میں سمٹ آئی تھی۔
پہلی حکومت کی برطرفی کے بعد محترمہ عوامی رابطہ مہم ہر نکلیں اور اباڑو، رحیم یار خان سے ہوتی ہوئی ملتان پہنچیں جہاں ایک جلسہ میں مشہور شاعر محسن نقوی نے دعا کے نام سے اپنی ایک نظم پڑھی جس کا آخری شعر یہ نعرہ تھا۔
اے عظیم کبریا
سن غریب کی دعا
سازشوں میں گھر گئی
بنت ارض ایشیا
لشکر یزید میں
ایک کنیز کربلا
فیصلے کی منتظر
ایک یتیم، بے خطا
ٹال سب مصیبتیں
ہے دعا تیرے حضور
واسطہ حسین ع کا
توڑ ظلم کا غرور
یا اللہ – یا رسول
بے نظیر بے قصور
اب یہ نعرہ محض بے نظیر بھٹو کا ہی نہیں بلکہ بھٹو خاندان کی سیاست میں قربانیوں کا عکاس ہے۔

Sunday, 17 November 2019

مرتضی بھٹو کی جلاوطنی سے واپسی اور ایک پوسٹر ۔۔۔آرٹیکل # 44


Article # 44

 مرتضی بھٹو کی جلاوطنی سے واپسی
 اور ایک پوسٹر

متعلقہ تصویر
رات گئے شہر بھر میں پوسٹرز چسپاں کر دیئے گئ

تحریر:اظہر عزمی
(ایک اشتہاری کی باتیں)
بڑے لوگوں کی زندگیاں بھی کتنی عجیب ہوتی ہیں۔ کتنے عام لوگ نہ چاھتے ہوئے بھی وقتی طور پر سہی ان کے ساتھ جڑ جاتے ہیں اور بڑے لوگوں کو اس کا پتہ بھی نہیں ہوتا۔بلا وجہ کا خوف اورخطرات گھیرے رہتے ہیں۔ہم خود ایک رات اس طرح گذار چکے ہیں۔
یہ1993کی بات ہے۔تاریخ انٹرنیٹ پر تلاش کر نے باوجود ڈھونڈ نہ پایا۔میں اپنی کُل وقتی جائے ملازمت (ایڈورٹائزنگ ایجنسی) پر تھا۔ اس زمانے میں موبائل فون عام نہ تھے۔ ٹیلی فون آپریٹر نے بتایا کہ آپ کے لئے کال ہے۔ لائن ٹرانسفر ہوئی۔ دوسری طرف سے جو آواز آئی میں اس وقت اس کی قطعاً توقع نہیں کر رہا تھا۔ یہ کال اس ایڈورٹائزنگ ایجنسی سے تھی کہ جہاں میں شام میں فری لانس کرنے جایا کرتا تھا۔ “کب تک آسکتے ہو؟”۔ میں نے جواباًکہا کہ شام میں۔ تاکید سے کہا گیا کہ وقت پرآجائیں۔ دیر نہ کریں، بہت ضروری کام ہے۔میں نے سوچا کوئی روٹین کا کام ہوگا اور کلائنٹ نے بے وجہ کی جلدی مچا دی ہوگی۔
شام آفس سے فارغ ہو کر میں سیدھا اپنی فری لانس والی ایجنسی پہنچا اور جاتے ہی کہا کہ بتائیں کیا کام ہے۔ کلائنٹ سروس کے بندے نے کہا کہ میرے پاس تو کوئی کام نہیں لیکن باس کو بہت ضروری کام ہے۔ ایک دو بار تمہارا پوچھ چکے ہیں۔ کچھ دیر انتظار کے بعد میں باس کے کمرے میں داخل ہوا۔بولے بیٹھو، میں بیٹھ گیا۔ اس کے بعد وہ کمرے میں موجود آفس کے ایک صاحب سے باتوں میں مصروف ہوگئے جیسے انہوں نے میرے آنے کو کوئی اہمیت ہی نہ دی ہو۔ عجیب کوفت کا شکار تھا۔ سوچ رہا تھا کہ جب اتنی جلدی ہے تو کام کا بتا کیوں نہیں رہے؟ خاموش رہا کیونکہ ہر ماہ باقاعدگی سے ایک معقول رقم ملتی تھی جس کی اس زمانے میں مجھے اشد ضرورت تھی۔ کمرے سے جیسے ہی آفس کے صاحب نکلے۔ باس نے ان کے دروازہ بند کرتے ہی میری طرف توجہ کی اور بولے کہ آج تمھیں بہت اہم کام کرنا ہے۔ میں نے کہا ٹھیک ہے۔ بتائیں؟ بولے لیکن اب صبح جائو گے۔ میں نے کہا کہ صبح کیوں؟ جیسے ہی کام ختم کروں گا۔ چلا جائوں گا۔ کہنے لگے کہ
یہ کام جو اب تمھیں کرنا ہے۔ یہ بہت رازداری کا کام ہے۔ میں نہیں چاہتا کہ اس کام کی کسی کو کانوں کان خبر ہو۔ میں چونک گیا کہ ایسا کون سا کام ہے کہ جس کی کسی خبر ہی نہ ہو۔میں نے کہا ہمارا کام تو اشتہار بنانا ہے تو اس کی خبر تو سب کو ہونی ہی ہے۔ اب جو انہوں نے مجھے کام کا بتایا تو کچھ دیر کے لئے میں اندر سے ڈرا سہما بیٹھا رہا۔ باس نے بتایا کہ کل صبح ذوالفقار علی بھٹو کے بڑے بیٹے مرتضیٰ بھٹو کراچی ائیر پورٹ پر لینڈ کر رہے ہیں۔
خیال رہے کہ یہ زمانہ محترمہ بے نظیر بھٹو کے اقتدار کا ہے اور اس زمانے میں عوامی طور پر یہ تاثر پایا جاتا تھا کہ محترمہ نہیں چاہتیں کہ مرتضیٰ پاکستان آئیں۔ بہرحال یہ ایک حقیقت ہے کہ محترمہ بے نظیر بھٹو اور مرتضیٰ بھٹو کی سیاست میں زمین آسمان کا فرق تھا اور اسی وجہ سے دونوں میں اختلاف رائے پایا جاتا تھا جس کا بعد میں کھل کر اظہار بھی ہوا۔ قصہ مختصر تفصیلات سننے کے بعد میں نے سوچا کہ اگر مرتضیٰ بھٹو کراچی ائیر پورٹ پر اترتے بھی ہیں تو عین ممکن ہے کہ انہیں گرفتار کر لیا جائے۔ مرتضیٰ بھٹو قریباً 16سال بعد وطن لوٹ رہے تھے۔ اس دوران ذوالفقار علی بھٹو کی پھانسی کے بعد الذوالفقار کے قیام اور پھر جہاز کے اغوا اور سیاسی قیدیوں کو چھڑانے جیسی کارروائیوں و دیگر پر مرتضیٰ بھٹو کے خلاف سنگین نوعیت کے مقدمات درج تھی گو کہ یہ مقدمات جنرل ضیاء الحق کے زمانے کے تھے۔
اس زمانے میں یہ بات بھی بہت عام تھی کہ محترمہ نصرت بھٹو مرتضیٰ بھٹو کو قومی سیاست میںداخل کرنا چاھتی ہیں لیکن محترمہ بے نظیر بھٹو ماضی کے واقعات یاکسی اور وجہ سے مرتضیٰ بھٹو کی سیاست میں انٹری نہیں چاہتی ہیں۔خیر میں نے پوچھا کہ مجھے کیا کام کرنا ہے۔ بولے کہ تمھیں پوسٹرکی کاپی لکھنی ہے۔ approval کے بعد اس کا ڈیزائن بنے گا۔ اس کے بعد یہ پوسٹر پرنٹ ہونے جائے گا اور پھر رات میں شہر بھر میں لگا دیا جائے گا۔ باس نے کہا کہ کیپشن catchy ہونا چاہیئے۔ اس زمانے میں ایک سیاسی حلقے کی جانب سے یہ بات موضوع بحث تھی کہ بھٹو کا وارث بھٹو ہی ہونا چاہیئے۔ یاد رہے کہ محترمہ بے نظیر بھٹو کی شادی آصف علی زرداری سے ہوچکی تھی۔ اس لئے ان دنوں محترمہ کے نام کے ساتھ زرداری لکھنے پر بھی اخبارات اور عوامی حلقوں میں اس موضوع پر دھواں دار بحث و مباحثہ ہوا کرتا تھا۔سندھ میں موروثیت کے حوالے سے پگ دار کا لفظ اس دنوں اخبارات میں بہت آیا کرتا تھا۔ باس نے کہا کہ کوئی ایسا کیپشن لکھو جس میں مرتضیٰ بھٹو کی کراچی آمد، تلوار (پیپلز پارٹی کا انتخابی نشان) اور پگ دار کے الفاظ آجائیں۔ کچھ دیر سوچنے کے بعد میں نے یہ کیپشن لکھا:
چمکی حیدر کی تلوار، آیا بھٹو کاپگ دار
اور پھر کراچی آمد کے حوالے سے مختصر سی باڈی کاپی اور غالباً نیچے پنچ لائن کے طور پر “بھٹو کا وارث بھٹوــ” لکھا۔ اب یہ میرے علم میں نہیں کہ اس کی approval لی گئی تو کس سے؟ بہرحال کاپی میں کوئی تبدیلی نہیں کی گئی اور اس پر پوسٹر کی ڈیزائننگ کا کام شروع ہوا جس میں یقیناً دیر لگنی تھی۔ بڑی مشکلوں سے یہ یقین دلانے کے بعد کہ میں اس بارے میں کسی کو بھی کچھ نہیں بتائوں گا رات بارہ بجے کے بعدمیری گلو خلاصی ہوئی۔ معاملے کی حساسیت کو دیکھتے ہوئے راستے بھر مجھے ہلکا ہلکا سا خوف رہا۔ گھر آیا اور کسی کو ایک لفظ بتائے بغیر سو گیا۔
صبح پھر وہی وقت پر آفس پہنچنے کی جلدی تھی۔ کراچی میں نئی نئی کوچ سروس شروع ہوئی تھی۔ راستے میں تو میری نظر نہیں پڑی لیکن میں جیسے ہی اپنے آفس کے اسٹاپ پر اترا تو کیا دیکھتا ہوں کہ جگہ جگہ مرتضیٰ بھٹو کی آمد کے پوسٹر لگے ہوئے ہیں جن پر جلی حروف میں مرتضیٰ بھٹو کی پگ والی تصویر کے ساتھ “چمکی حیدر کی تلوار، آیا بھٹو کا پگ دار” لکھا ہے۔ کچھ سمجھ میں نہیں آرہا تھا کہ کیا کیا جائے۔ کسی کو اب بھی بتائوں یا خاموش ہی رہوں۔ آفس آیا۔ حسبِ عادت میڈیا ڈیپارٹمنٹ میں جا کر اخبارارت دیکھے تو کراچی کے سب سے کثیر الاشاعت اخبار ایک کالمی خبر چھپی ہوئی تھی کہ رات گئے کراچی میں مرتضیٰ بھٹو کی آمد پر خیر مقدمی پوسٹر لگا دیئے گئے۔ مرتضیٰ بھٹو تو خیر کراچی آگئے مگر ہمیں خوف نے کئی دنوں تک گھیرے رکھا۔

Wednesday, 16 October 2019

بڑا بھائی ۔۔۔ کچھ دکھ اس کے بھی ہیں ۔ آرٹیکل # 43


Article # 43


بڑا بھائی ۔۔۔ کچھ دکھ اس کے بھی ہیں


دیکھیں کہیں یہ آپ ہی تو نہیں

اظہر عزمی

(ایک اشتہاری کی باتیں)
پہلے کم کم ملتا تھا۔ اب بار بار ملنے لگا ہے۔ کبھی دوستوں میں کھڑا باتیں کر رہا ہوتا ہے۔ مجھے دور سے آتا دیکھتا ہے تو خاموش ہو جاتا ہے۔ کوشش کرتا ہے کہ میں اسے نہ دیکھوں۔ یہ اس کا حق ہے دوستوں سے ملے، ہنسی مذاق کرے۔ میں جانتا ہوں وہ ڈرتا ہے کہیں اس کے منہ سے کوئی ایسی بات نہ نکل جائے جو میں اس کے والد سے کہہ دوں۔ اصل میں اس کے والد نے مجھ سے کہہ رکھا ہے کہ میں اس پر نظر رکھوں۔اب اسے یہ کون بتائے کہ میں اس پر پولیس والی تفتیشی نظر تھوڑی رکھتا ہوں۔ کبھی گھر کا سودا سلف لارہا ہوتا ہے تو نظروں ہی نظروں میں مودبانہ سلام کرتا ہے۔
ایک دن صبح آفس جاتے ہوئے بس اسٹاپ پر مل گیا۔ اسکول یونیفارم پہنے گھر کی طرف جا رہا تھا۔ مجھے بڑا غصہ آیا کہ اس نے آج اسکول کی چھٹی کر لی۔ دل چاھا ایک تھپڑ رسید کردوں۔ میں نے پوچھا تو بولا “دیر سے آنکھ کھلی۔ ساری بسیں بھری ہوئی آرہی تھیں۔ گیٹ پر لٹکنے کی بھی جگہ نہ تھی۔میں غصہ میں تھا،بولا:
جب دیر سے اٹھو گے تو یہی ہوگا؟
کہنے لگا : رات چھوٹے بھائی کو بخار تھا۔ میں بھی جاگتا رہا۔یہ کہہ کر وہ گھر کی جانب چل دیا۔
میں چاھتا ہوں کہ وہ مجھے نظر نہ آئے۔ کبھی غصہ آتا ہے تو کبھی بہت جھنجھلاہٹ ہوتی ہے۔ اس کی سنے بغیر خوب ہی سناتا ہوں۔ سوچتا ہوں ہر وقت کی ڈانٹ پھٹکار اچھی بات نہیں۔ کسی دن اس نے جواب دے دیا تو کیا عزت رہ جائے گی؟ مگر نہ جانے کیوں مجھے یقین ہے کہ وہ بدتمیزی نہیں کرے گا۔
گذری عید میں بھی دیر سے مسجد پہنچا۔ وہ مجھے مسجد کے باہر کھڑا نظر آگیا۔ اندر نمازِ عید ہو رہی تھی۔ مجھ سے نہ رہا گیا:
شرم کرو، عید کی نماز پڑھنے میں بھی جان جا رہی ہے کیا؟
کچھ دیر نظریں جھکائے خاموش کھڑا رہاپھر بولا: پاپا کو مت بتا دیجئے گا۔غصہ ہوں گے۔

ایک دن اس کی والدہ کے پاس گیا تو بولیں:
میں نے کہاکہ ہاں تم عید کی نمازنہ پڑھو اور وہ کچھ بھی نہ کہیں۔ بتانے لگا کہ وہ میرا کرتا چھوٹا تھا۔ صبح پہنا تو پتہ چلا۔ میں بھی تلا بیٹھا تھا “تمہاری کاہلی کی عادت جائے گی نہیں؟”۔ ایک دن امتحان کے دنوں میں ملا، گھبرایا لگا، بولا کہ کل انگلش کا پیپر ہے، پڑھا دیں گے۔ اب جو میں لے کر بیٹھا تو اسے تو Tenses تک نہ آتے تھے۔ Essay اور Active Passive تو بہت دور کی بات ہے۔جب میں نے اس کی کلاس لی تو بولا “اتنا تو کردیں کہ پاس ہو جائوں”۔ وہ اوسط درجے کا ذہین ہے مگر گھبرایا گھبرایا رہتا ہے۔ احساسَ کمتری کا شکار لگتا ہے۔دیکھنے میں بھی ذرا عجیب سا ہے۔ قد لمبا ہے اوراس پر دُبلا بھی ہے۔بولتا بھی تیز تیز ہے۔لوگ شارٹ ہینڈ میں لکھتے ہیں۔یہ شارٹ ہینڈ میں بولتا ہے۔
ذرا اسے سمجھائو۔ ہر وقت گھر میں چھوٹے بھائیوں سے ہنسی مذاق کرتا رہتا ہے۔ بڑا بھائی ہے، باپ کی جگہ ہے۔
میں اُن کی بات سن کر تو آگیا مگر سوچنے لگا کیا سمجھائوں اس کو۔ ابھی تو وہ خود اتنا چھوٹا ہے۔ باپ کی جگہ والی بات کہوں گا تو کہے گاـ:
کیا ہو گیا آپ کو۔۔۔ابھی سے میں پاپا کے برابر کہاں سے ہوگیا؟
اب میں اسے کیا بتائوں کہ ہمارے معاشرے میں پہلا بیٹا پیدا ہی باپ جتنا ہوتا ہے اور پھر ساری زندگی اسی میں گذار دیتا ہے۔بچپن میں ہی بزرگی کی چادر پہنا کر بچپن چھین لیا جاتا ہے۔ یہ ایک ایسا اعزاز ہے جس کے لئے اس نے کوئی محنت نہیں کی ہوتی ہے۔پیدا ہوتے ہی یہ اعزاز اس کی گردن میں ڈال دیا جاتا ہے جو وہ چاھے بھی تو نہیں اتار سکتا۔ باپ کی یہ وراثت مرتے دم تک اس سے کوئی نہیں چھین سکتا اور نہ ہی کوئی اس کا دعویٰ دار سامنے آتا ہے۔ہر قربانی کے جواب میں صرف ایک جملہ سنائی دیتا ہے”تو کیا ہوا۔بڑا بھائی ہے۔ باپ کی جگہ ہے، کوئی احسان تھوڑی کیا ہے؟”۔ بچپن میں بھی اس کی اپنی کوئی چیز نہیں ہوتی ہے۔ چھوٹوں کا حق اس کی ہر چیز پر ہوتا ہے۔جب اسے دنیا سے اپنا حق لینے کی تربیت دینی چاہیئے۔ ہم اسے قربانی کے نام پر پیچھے ہٹنے کا عظیم درس دے رہے ہوتے ہیں۔ آپ اس کچے ذہن سے بنیادی طور پر آگے بڑھنے کی طلب بھی تو چھین رہے ہیں۔ ہم اسے اپنی خواہشات میں ڈھال کرچھوٹوں کے لئے سیکیورٹی چاھتے ہیں لیکن دوسری جانب ہم ایک انسان کو قربان گاہ میں لے آتے ہیں۔ ایک دوسرے کے کام آنا تو ہر ایک کی ذمہ داری ہے لیکن کسی ایک کو اس پوسٹ پر “ملازمت” دے دینا کہاں کا انصاف ہے؟
ایک دن وہ مجھے کرکٹ کھیلتے بچوں سے الگ تھلگ بیٹھا ملا، اداس تھا۔ میں خود ہی اس کے پاس چلا گیا۔ مجھے دیکھ کر وہ احترام میں اٹھ جایا کرتا تھا لیکن آج ایسا نہیں ہوا۔ میں نے بھی برا نہیں مانا اور خود ہی بات شروع کردی “امتحان ہونے والے ہیں۔ تیاری نہیں کی ہوگی؟”۔ بولا “اس میں میرا کیا قصور؟”۔ میں نے کہا “سارا قصور تمہارا ہے”۔ اس نے پہلی بار مجھے غصہ سے دیکھا “آپ کو بھی ناں، بس میں ہی نظر آتا ہوں۔ اس میں میری کیا غلطی ہے۔ مجھ سے پوچھتے تو صاف صاف منع کر دیتا”۔ مجھ سے بھی رہا نہ گیا، کہہ دیا”پڑھو گئے نہیں تو بڑے آدمی کیسے بنو گے؟”۔ آج وہ ہر بات کا جواب دینے کو تیار بیٹھا تھا “میں نے کوئی بڑا آدمی نہیں بننا۔ بڑا آدمی بن کر کیا کروں گا؟ سب کہتے ہیں تم پاپا کی جگہ ہو۔ پاپا کا کیا ہے اتنی محنت کرتے ہیں۔ ہم ہیں پھر اس کے بعد ہمارے چاچا ہیں، پھوپھی ہیں۔ سب کے ساتھ کھڑے ہوتے ہیں۔ پاپا کے اپنے پاس کیا ہے دو پینٹوں اور شرٹوں کے علاوہ؟”۔ میں نے اسے بتانے کی کوشش کی کہ تمہارے پاپا بہت اچھے ہیں۔ سب کے کام آنے والے انسان ہیں۔ تمھیں ان کے نقشِ قدم پر چلنا ہے۔ میرا خیال تھا کہ وہ نقشِ قدم کا مطلب نہیں سمجھے گا لیکن ایسا بالکل بھی نہیں تھا۔ بولا “چھوڑیں، نقشِ قدم کیا بننے ہیں۔ ایک ہی شوز ہیں ان کے پاس جو نیچے سے دو مرتبہ اتنا گھس چکے ہیں کہ پاپا کی جرابیں پھٹ جاتی ہیں۔ موچی نے بھی کہہ دیا کہ اپنے ابا کو بولو، نیا خرید لے۔ اب یہ لے کر مت آنا”۔ آج تو وہ مجھے حیران کئے جارہا تھا۔ میں نے اسے سمجھانا چاھا مگر وہ میری سننے کے موڈ میں ہی نہ تھا۔ کہنے لگا “آپ گھر میں سب سے بڑے ہوتے تو آپ کو پتہ چلتا۔۔۔ بڑا بھائی ہونا کتنا مشکل ہوتا ہے”۔
میں خاموشی سے اٹھ کر چلا آیا۔ اب اسے کیا بتاتا کہ میں بھی گھر میں سب سے بڑا ہوں۔

Sunday, 13 October 2019

آئیں ! افواہ پھیلانا سیکھیں ۔ آرٹیکل # 42

Article # 42 


آئیں ! افواہ پھیلانا سیکھیں 

تحریر : اظہر عزمی
(ایک اشتہاری کی باتیں)



یہ میڈیا کا زمانہ ہے۔ کوئی بات پھیلانا منٹوں کی بات ہے۔ جتنی انسانی تاریخ پرانی ہے ، افواہ کی تاریخ بھی اتنی ہی پرانی ہے ۔ افواہ کا مقصد ،تعین ، تانا بانا ، پھیلانے کا طریقہ کار اور ذرائع کااستعمال ۔افواہ ا نفرادی ہے یا اجتماعی ، ملکی نوعیت کی ہے یا عالمی ۔اس سب کی ایک سائنس ہے۔ 

افواہ عربی کا لفظ ہے ۔یہ عربی میں مذکر اور اردو میں مونث ہے۔ ہم اس کو خواتین سے معذرت کے ساتھ  مونث ہی لے لیتے ہیں۔ ہماری ہاں افواہ اڑائی جاتی ہے ۔ اردو میں اسے ہوائی بھی کہا جاتا ہے۔ شعر عرض ہے :

کون کہتا ہے کہ ہم تم میں جدائی ہوگی
یہ ہوائی  کسی  دشمن  نے  اڑائی  ہوگی 

آج کی مہذب دنیا افواہ کو پروپیگنڈا  کا نام بھی دیتی ہے۔ جسے سیاسی جماعتیں اور حکومتیں بھرپور طریقہ سے استعمال کرتی ہیں ۔ عالمی سیاست میں پروپیگنڈا جنگوں سے زیادہ کار گر ہتھیار ہے جس پر بے تحاشا پیسہ لگایا جاتا ہے۔ کہتے ہیں کہ پروپیگنڈے کے ہتھیار کو سب سے پہلے دوسری جنگ عظیم میں استعمال کیا گیا اور وہیں سے اس کی افادیت اور حاکمیت کا اندازہ ہوا۔

روزمرہ زبان میں اسے بے پر کی اڑانا بھی کہتے ہیں ۔ آپ لاکھ کہیں کہ میں کبھی کسی افواہ ، ہوائی یا بے پر کا حصہ نہیں بنا تو صاحب جس معاشرے میں قیام پذیر ہیں یہاں اگر یہ سب نہ تو زندگی میں مزہ ہی کیا ہے۔ ہمارے ہاں تو لوگ سچ کو چھپانے اور افواہ کو سچ ثابت کرنے پر تلے بیٹھے ہوتے ہیں ۔ اصل بات یہ ہے کہ شعور کا نہ ہونا اور وقت کی فراوانی افواہوں کی سب سے زرخیز زمین ہے۔ میں نے بڑے بڑے معقول لوگوں کو افواہ جیسے سستے شغل سے لطف اندوز ہوتے اور اسے یقین سے آگے بڑھاتے دیکھا ہے۔ افواہ سازی اور افواہ فروغی ہمارا قومی مزاج کا حصہ ہے ۔ 

افواہوں سے ہماری  تاریخ کا چہرہ بڑی طرح مسخ ہے۔ کوئی تردید و تصدیق کا پیمانہ نہیں ۔ شخصیت پرستی کے عذاب میں افواہیں حقیقت کا روپ دھار چکی ہیں جس پر ہمارے کج فہم لوگ مرنے مارنے پر تیار ہوتے ہیں ۔ بادشاہوں تو خیر کرائے کے مورخوں سے نہ جانے کیا کیا کچھ لکھواتے رہے ہیں۔  ادب کافی حد تک اس سے محفوظ رہا ہے۔

ادب   کا  مظلوموں  کا  سرمایہ  ہے
اور تاریخ شہنشاہوں نے لکھوائی ہے

افواہ سازی اب ہمارے ملک میں منافع بخش  انڈسٹری کی صورت اختیار کر چکی ہے جس میں زیر زبر پیش کے ساتھ ٹی وی چینلز ہراول دستے کا کردار ادا کر رہے ہیں۔یہ افواہ ساز بھی ہیں اور اپنے ہروگرامز کی ریٹنگ بڑھانے اور اس سے ٹی وی اشتہارات لینے کے لئے افواہ فروشی ہی کرتے  ییں۔
  
پہلے جب میں میڈیا اس حد طاقتور  نہیں تھا یا یوں کہہ لیں کہ تھا ہی نہیں تو یہ افواہیں سینہ بہ سینہ پھیلتیں جو کہ سینہ گزٹ بھی کہلاتیں ۔آئیں میں آپ  کو اپنے لڑکپن کے زمانے میں لے چلتا ہوں جب پہلی مرتبہ مجھے ایک افواہ ساز سے ملنے کا انتخاب ہوا۔  یہ کوئی اور نہیں میرا اسکول کا ہم جماعت تھا۔ جنرل ضیا الحق کا زمانہ تھا ۔ ایک دن وہ اور میں مارکیٹ گوشت لینے گئے۔ قصائی کے پاس بہت رش تھا۔ ہم دونوں ایک طرف کھڑے ہو گئے۔ وہ مجھ سے باتیں کرتے ہوئے بولا:

 بھائی لالو کھیت (لیاقت آباد) میں ہنگامہ شروع ہو چکا ہے۔ پولس شیلنگ کر رہی ہے۔ 

 میں حیران کہ یہ اسے کیا ہوا ؟ میں نے حیرت کا اظہار کیا اور قویب تھا کہ کچھ بولتا ۔ اس نے میرا ہاتھ دبا دیا ۔ میں نے محسوس کیا کہ دکان پر کھڑے افراد اور قصائی بظاہر میرے دوست کی طرف نہیں دیکھ رہے لیکن سب کے کان اسی طرف لگے ہیں ۔ دوست نے ہنگامہ سے متعلق زیادہ تفصیلی گفتگو نہیں کی۔ 

اب ذرا تماشا دیکھیں ۔ ایک خاتون جو گوشت لینے میں بہت مین میخ کر رہی تھیں :

بالکل روکھا گوشت دو۔ چھیچھڑے نہیں لوں گی 

جیسا کہ عام طور مین میخیے گاہک  کرتے ہیں۔ ایک دو بار تو قصائی نے اس کی فرمائش پوری کی۔ آخر چڑ کر بولا : اماں جیادہ نخرے نہ کر ۔ جلدی لے لے جو لینا ہے۔ لالو کھیت میں بڑی جوروں کا ہنگامہ چل ریا ہے"۔ اس پر ساتھ کھڑے گاھک نے جو اس عورت کے فرمائشوں سے تنگ تھا، بول پڑا  ۔ خاتون نے جو یہ ماحول دیکھا تو خاموشی سے گوشت لے کر چلی گئیں ۔ باقی گاہک بھی زیادہ بحث میں نہیں پڑے اور ہم بہت جلد گوشت لے کر وہاں سے آگئے۔ میں نے افواہ ساز دوست سے کہا کہ تم نے ایسا کیوں کیا؟ ۔بولا دکان پر رش دیکھا تھا ۔ اگر یہ سب نہ کرتا تو گھنٹہ تو لگنا ہی لگنا تھا ۔ میں نے کہا : 

کیا فرق پڑتا ؟ 

بولا : اب تم دیکھنا کیسا فرق پڑتا ہے۔ یہ قصائی ہر گاہک کو الٹا سیدھا گوشت دے گا اور کہے گا " بھیا جلدی جلدی گوشت لے لو ۔ پتہ نہیں شام تک ہنگامہ پھیل نہ جائے۔ اللہ جانے کل دکان کھلے بھی کہ نہیں "۔اسی طرح ہر گاہک گھر اور محلے میں یہ افواہ ایسے  سنائے گا کہ جیسے خود ہنگامہ دیکھ کر آرہا ہے۔"۔

جب ہم کالج پہنچے تو اس وقت بھی جنرل ضیا ملک پر مسلط تھے۔ سیاست پر پابندی تھی۔ اخبارات سخت سنسر شپ کا شکار تھے۔ آدھے اخبارات خالی شائع ہوا کرتے۔ حد تو یہ ہوئی کہ جب بھٹو صاحب کی پھانسی کے بعد ان کی صاحبزادی صنم بھٹو کی شادی ہوئی تو اخبار میں سر شاہنواز بھٹو کی پوتی کی شادی کی مختصر سی خبر  شائع ہوئی۔

یہ بات تو خیر ضمننا آگئی۔ سیاسی جماعتیں جنرل ضیا زمانے میں بھی سینہ گزٹ خبروں اور افواہوں کے لئے عوامی مقامات استعمال کیا کرتے گو کہ اس میں بھی کافی خطرہ ہوتا ۔ ہمارے محلے میں ایک صاحب ہواکرتے تھے۔ عمر کوئی 60 سے اوپر ہوگی۔ ایک سیاسی جماعت کے سکہ بند کارکن تھے۔ ہمارے 2D سے کالج جانے اور ان کا کام پر جانے کا ایک ہی وقت تھا۔ بس سمجھ لیں جس کے ساتھ وہ بیٹھ گئے اس کی جان مصیبت میں ہوتی ۔پہلے برابر والے سے سلام دعا کرتے اور پھر اونچی آواز میں عوامی مسائل کا سہارا لے کر حکومت پر لعن طعن شروع کردیتے اور اس کے بعد جو افواہ اڑانا یا ان کی دانست میں پیغام دینا ہوتا دے دیتے۔ مسئلہ یہ تھا کہ ان کی کوئل جیسی آواز بہت اونچی تھی جو پوری بس میں گونجتی۔ یہ لوگ ان کو جانتے تھے ذرا ہٹ کر رہتے۔ میں تو جہاں ان کو دیکھتا بس کی دوسری طرف چلا جاتا ۔

افواہ پھیلانے اور اس کو سمجھنے کی بھی ایک سائنس ہے۔ بہتر ہے کہ آپ اس باخبر ہوجائیں اور اب آپ کی مرضی کہ آپ اس کی تشہیر میں ملوث ہوں یا  نہ ہوں ۔

افواہ کیا ہے ؟ بازای خبر جس کا کوئی سر پیر نہہں ہوتا ۔ لوگوں کو ارادی یا غیر ارادی طور پر دھوکا دینے کے لئے جھوٹ بولنا۔ افواہ کی کئی اقسام ہیں اس لئے وقت کے ساتھ ساتھ اس کی تعریف اور فوائد بھی بڑھتے جاتے ہیں۔  

مقصد اور ہدف کے تعین کے بعد افواہ ایسی ہو جو کہ سنسنی پھیلا دے اور سننے والا بلا سوال و جواب اور تصدیق آگے سنانے کے لئے دوڑ پڑے۔ افواہ عوامی امنگوں کی آئینہ دار ہونی چاہیئے ۔اس میں نفع نقصان  دونوں کا پہلو ہو سکتا ہے۔ ہماری عوام دونوں افواہوں کو ایک ہی انداز سے لیتی ہے۔ افواہ بہت زیادہ بے پر کہ نہیں ہونی چاہیئے اس میں کسی حد تک یقینیت ہونا امر ضروری ہے۔ افواہ کو کبھی تفصیل سے نہ بیان نہ کریں ۔ افواہ جتنی سادہ ہوگی اتنی ہی تیزی سے جنگل کی آگ کی طرح پھیل گی۔ زیادہ پھندنے بازی کی تو افواہ اپنی موت آپ کو جائے گی۔

افواہ پھیلانے کے لئے لوگوں کا انتخاب بہت اہمیت کا حامل ہے۔ بہت زیادہ  کھوجی اور پرتجسس لوگ افواہ سے متعلق سوال جواب شروع کردیتے ہیں جو کہ افواہ کے لئے زہر قاتل ہے۔ افواہ کے لئے ضروری ہے کہ ہر ایک تنہائی میں بتائی جائے اور تاکید کردی جائے کہ کسی کو ہرگز ہرگز نہ بتانا۔ افواہ کی برق رفتاری اور  یقینییت چیک کرنے کا سب سے آسان طریقہ یہ ہے کہ پہلے اس اپنے قریبی حلقہ احباب میں پھیلائیں اور دیکھیں یہ کب تک اور کتنی بدلی ہوئی شکل میں آپ تک پہنچتی ہے۔  افواہ میں جو اضافت ہو اس سے اندازہ لگا لیں کہ آپ نے عوامی خواہشات کا کتنا خیال نہیں رکھا۔ آئندہ  افواہ پر اس بات کا پوری طرح خیال رکھیں۔


Friday, 4 October 2019

کیا ہم ردعمل کی قوم ہیں ؟ آرٹیکل # 41

Article # 41




کیا ہم ردِ عمل کی قوم ہیں؟ 


ہنری ایک سوال چھوڑ گیا ہے


اظہر عزمی
(ایک اشتہاری کی باتیں)


ایڈورٹائزنگ کی دنیا بھی عجیب ہے۔ آپ کو ملک و بیرون ملک سے بھانت بھانت کے لوگ ملتے ہیں۔ ان کے سوال آپ کو نئی راہ دکھاتے ہیں، متفکر کر دیتے ہیں۔ جن باتوں پر آپ کا دھیان بھی نہیں جاتا ہے وہ ان سے متعلق سوال پوچھ کرکچھ لمحوں کے لئے آپ کو جھنجھوڑ دیتے ہیں۔ کچھ سوالوں کا جواب بن پڑتا ہے۔ کچھ کا آپ جواب تو دے دیتے ہیں۔ سوال کنندہ کو ممکن ہے مطمئن بھی کر دیتے ہوں مگر کہیں بے اطمینانی چھپی رہتی ہے۔

یہ 90 کی دھائی کا نصف تھا۔ ایک بڑے مشہور ملٹی نیشنل سگریٹ برانڈ کی کمرشل کی شوٹنگ کے لئے ڈائریکٹر ہنری کو آسٹریلیا سے اور کیمرہ مین اور اس سے متعلقہ افراد کو بنکاک سے بلایا گیا۔ ہنری مکمل طور پر ایک پروفیشنل ڈائریکٹر تھا۔ ٹی وی کمرشل کے اسکیچ کردہ فریمز اس کو پہلے پہنچا دیئے گئے تھے۔ صبح ہنری اور کیمرہ مین سے میٹنگ ہوئی۔ شام کو میوزک ڈائریکٹر کے پاس گئے تو ہمیں پہلی بار پتہ چلا کہ ٹی وی کمرشل کی پسِ پردہ موسیقی کے لئے گراف کے ذریعے بریف دی جاتی ہے جس میں ایک ایک سیکنڈ کا حساب ہوتا ہے۔ اس سے پہلے ہم لوگ میوزک ڈائریکٹر کو لوکل طریقے سے منہ زبانی بتا دیا کرتے تھے اور کام چل جاتا تھا۔
شوٹنگ پہلے کراچی اور پھر لاہور میں تھی۔ کراچی کے ایک مشہور کالج جو کہ قیام پاکستان سے قبل تعمیر ہوا تھا اس کے مین گیٹ کے سامنے پہلا سین تھا تاکہ پس منظر میں کالج کی پُرشکوہ عمارت نظر آسکے۔ پہلے ہی دن احساس ہو گیا کہ 45 سے 50 سال کی عمر کا حامل ہنری تخلیقی صلاحیتوں سے مالا مال ہونے کے ساتھ ایک محنتی ڈائریکٹر تھا۔ دوسری بات یہ کہ اسے کوئی بات پوچھنے میں کسی قسم کا عار نہیں تھا۔ ہنری کم گو ضرور تھا لیکن مشاہدے اور تجزیہ کی بھرپور صلاحیت رکھتا تھا۔ دراز قد ہونے کے ساتھ مضبوط جسامت رکھتا تھا۔
ٹی وی کمرشل تین حصوں پر مشتمل تھا۔ پہلے حصّہ میں باپ اپنے بیٹے کے اچھے نمبروں سے پاس ہونے پر بہت خوش ہے۔ شوٹنگ فریمز کے مطابق جاری تھی لیکن وہ مطمئن نہیں ہورہا تھا۔ مجھ سے کہنے لگا کہ آپ کے کلچر میں باپ بیٹے سے اپنی انتہائی خوشی کا اظہار کس طرح کرتا ہے؟ آیا پیٹ تھپتھپاتا ہے، کاندھے پر ہاتھ رکھتا ہے یا سینے سے لگا لیتا ہے؟ میں نے کہا کہ ہاں ایسا کچھ ہی کرتا ہے۔ بولا کہ یہ سب کچھ تو ہمارے ہاں بھی ہوتا ہے۔ کوئی ایسا Gesture بتائو جو تمھارے کلچر می ںبے ساختگی کے ساتھ ہوتا ہو؟۔ اب اس نے مجھے سوچنے پر مجبور کردیا۔
کچھ دیر بعد میرے ذہن میں وہ خیال آہی گیا۔ میں نے اس سے کہا کہ محبت کے اظہار کا انتہائی طریقہ یہ ہے کہ باپ وارفتگی کے ساتھ بیٹے کا ماتھا چوم لیتا ہے۔ یہ آئیڈیا اس کو اچھا لگا۔ کہنے لگا کہ تم مجھے پرفارم ر کے بتائو۔ میں نے کیا۔ اس کو بہت پسند آیا اور بولا کہ ہم یہ بھی شوٹ کریں گے۔ بتانے کا مقصد یہ ہے کہ وہ لکیر کا فقیر نہ تھا۔ سوچتا تھا کہ بہتر سے بہتر کیا ہوسکتا ہے۔ ہم نے جس Company کو اس ٹی وی کرشل کے تمام تر انتظامات کے لئے Hire کیا تھا۔ ان کا بھی یہ پہلا بڑا کام تھا۔ تجربے کی کمی تھی اور کچھ مزاجاّ آنا کانی کی عادت تھی۔ شوٹنگ کے دوران شوٹنگ سے متعلق چیزیں، ڈائریکٹر کی شوٹنگ کے وقت کی ضروریات غرض کمپنی کو پوری شوٹنگ میں ایک پیر پر کھڑا ہونا ہوتا ہے۔ کوئی بھی ایمرجنسی آسکتی ہے۔ نج سے تج سب کچھ انہیں کرنا ہوتا ہے جس کا انہیں بھاری معاوضہ دیا جاتا ہے۔
کراچی کے بعد ہم لاہور پریس کلب اور پھر کینو کے باغات میں شوٹنگ کے لئے لاہور سے قریب ایک بڑے باغ لاہور میں شوٹنگ کرتے رہے۔ انتظامات سنبھالنے والی کمپنی کی جانب سے ہمیں ایک ہی روش کا سامنا رہا۔ ہم اکثر اوقات غصے میں آجاتے اور انہیں خوب ہی برا بھلا کہتے مگر حیرت انگیز بات یہ تھی کہ اس سستی اور کاہلی کا اصل وصول کنندہ ہنری تھا مگر وہ خاموش رہتا جس پر ہم اس کے صبر کی داد دیتے اور کبھی اس صبر کو پرفیشنل ازم کے کھاتے میں ڈال دیتے۔ ہنری اپنے کام سے کام رکھنے والا آدمی تھا۔ لاہور میں شوٹنگ کے آخری دن اس نے یہ ثابت بھی کردیااور ہم سب کے ہاتھوں کے طوطے اڑا دیئے۔ سب ہوٹل آگئے لیکن ہنری نہ آیا۔ ہم سب پریشان کہ ہنری کہاں چلا گیا۔ کافی دیر بعد ہنری آیا تو اس کے ہاتھ میں لکڑی کے مختلف چھوٹے بڑے ٹکٹرے تھے۔ ہم حیران کہ یہ کیا اٹھا لایا۔ پوچھا تو بتایا کہ وہ فری لانس ڈائریکٹر ہے۔ سال میں ہر وقت تو کام ہوتا نہیں اس لئے اپنے فارغ وقت میں وہ فرنیچر ڈیزائن کر کے خود ہی بناتا اور فروخت کرتا ہے۔ اس لئے وہ ڈرائیور کو لے کر اکیلا ہی لاہور کی ٹمبر مارکیٹ گیا تھا۔ ممکن ہے کہ وہ کچھ لکڑی پاکستان سے خرید بھی لے۔
ہم واپس کراچی آگئے۔ کراچی میں ایک اسپورٹس کمپلیکس میں شوٹنگ کا آخری دن تھا۔ اس نے انتظامات سنبھالنے والی کمپنی سے کسی آدمی سے کچھ لانے کو کہا۔ وہ نہ لایا۔ شوٹنگ رکی رہی۔ اب ہنری کا صبر جواب دے گیااور اس نے انگریزی کی بہت عام سے گالی بک ہی دی۔
اس کے بعد بہت دیر تک معذرت کرتا رہا۔ اب اسے کیا پتہ کہ شوٹنگ کے دوران کس طرح بے حساب مغلظات بکی گئی ہیں۔ اخلاقیات کے دریا بہائے گئے ہیں۔ زبانوں کو کس کس طرح پوتر کیا گیا ہے۔
شوٹنگ ختم ہوئی تو سب Relax کر گئے۔ شام ہوچلی تھی۔ گرم گرم چائے تھکن اتارنے میں مصروف تھی کہ ہنری نے ایک سوال داغ دیا:

initiate آپ لوگ کسی کام کو خود سے کیوں نہیں کرتے؟

میں نے کہا : کیا مطلب؟

کہنے لگا:
پوری شوٹ میں جب تک کہا نہ گیا کسی نے کوئی کام نہیں کیا گیا۔ حالانکہ انہیں معلوم تھا کہ کب کس کام کی ضرورت ہے۔ جب بھی کوئی چیز مانگی گئی۔ پہلے تو کوئی آیا ہی نہیں اور جب کوئی ایک آیا تو اس کی دیکھا دیکھی دس لوگ دوڑ پڑے۔
میں خاموش رہا کیونکہ پوری شوٹ میں، میں خود اس کا گواہ تھا۔ ہنری نے کسی دانشور کی طرح میرے بازو پر ہاتھ رکھتے ہوئے کہا:
آپ کو معلوم ہے کہ دنیا میں ایسی قوموں کو ردِ عمل کی قومیں کہا جاتا ہے۔ ایسی قومیں کبھی پہل نہیں کرتی ہیں۔ جو کچھ بھی کرتی ہیں کسی دوسرے کے عمل کے ردِ عمل میں کرتی ہیں۔ اس لئے ان کی ترقی کی رفتار سست ہوتی ہے یا پھر ہوتی ہی نہیں۔
میں نے اپنے طور پر وہ تمام دلائل دیئے جو اس بات کو ثابت کرتے کہ ہم ردِ عمل کی قوم نہیں ہیں۔ ممکن ہے ہنری مطمئن ہوگیا ہو لیکن میں نہیں۔ ماضی کے جھرونکے میں جھانکوں تو لگتا ہے کہ اس نے صحیح کہا ہے لیکن پھر پاکستانی دل کہتا ہے کہ کسی بہکاوے میں آنے کی کوئی ضرورت نہیں۔ ایسا بالکل بھی نہیں۔ تم ایک بے مثال، باکمال قوم کے فرد ہو۔ مطمئن ہونے کی کوشش تو کرتا ہوں لیکن جب ملک کی حالت ِزار دیکھتا ہوں تو پھر ہنری کا سوال میرے سامنے آ کھڑا ہوتا ہے۔ اگر کسی کے پاس کوئی واضح جواب ہے تو بتائے؟

عمر بڑھ جائے تو ایک محترمہ سے بچ کر رہیں . Article 91

Article # 91 رنج و مزاح  عمر بڑھ جائے تو ایک محترمہ سے بچ کر رہیں  تحریر : اظہر عزمی ہمارے ایک دوست بہت دلچسپ ہیں ۔ گفتگو میں آخر تک تجسس و ...