ایک مریض کی زندہ درگور تعزیت ۔ آرٹیکل # 72

 ایک مریض کی زندہ در گور تعزیت

آج کی رات بچیں گے تو سحر دیکھیں گے

تحریر : اظہر عزمی

 

ہمارے ہاں کسی بیمار کی عیادت اور اس سے ہمدردی میں ، ہم  وہ کچھ کر جاتے ہیں کہ مریض کی رہی سہی جان بھی نکال دیتے ہیں ۔ گفتگو سے لگتا ہے کہ مزاج ہرسی کے بجائے پرسے کے لئے آئے ہیں ۔ مریض کو " قریب القبر " کی خبر دینے  کے لئے ایڑی چوٹی کا زور لگا لیتے ہیں ۔ اسے اس درجہ آمادہ موت کرتے ہیں کہ مرض سے نہ مرے تو کم از کم خودکشی کو  "خودخوشی" جانتے ہوئے ایک چانس تو لے ہی لے ۔ مریض کے کھانے کے لئے پھل ساتھ لاتے ہیں مگر سینے میں ا

یسے ایسے پھل اتار جاتے ہیں کہ وہ خود کہہ اٹھے ۔

آج کی رات بچیں گے تو سحر دیکھیں گے 

کل اسپتال میں داخل اپنے ایک دوست ریاض بھائی کی عیادت کو گیا تو اس دوران ان  کے سسرال کی دو خواتین اور ایک مرد آگئے ۔ میں نے اٹھنا چاھا تو ریاض بھائی نے ہاتھ پکڑ کر بٹھا لیا اور بولے : تم ہو گئے تو جلدی چلے جائیں گے ۔ میں نہ چاھتے ہوئے بھی کرسی کھسکا کر دیوار کے ساتھ بیٹھ گیا ۔ کچھ دیر بعد دو خواتین چادر اوڑھے اور ان کے ساتھ ایک صاحب کمرے میں داخل ہوئے ۔ دونوں خواتین جو کہ 50 کے پیٹے میں ہوں گی اور صاحب ان سے کچھ سال بڑے ہوں گے ۔ دونوں خواتیں نے میری موجودگی کو عیادت جیسی عبادت میں مخل ہونے  کا تاثر دیا بلکہ ریاض بھائی  کے ساتھ ذرا سا ترچھی کرسیوں کے ساتھ بیٹھیں بلکہ ایک نے تو اپنی چادر کا پلو دانت میں ہی دبا لیا تھا تاکہ میرے دیکھنے کے امکانات ہی ختم ہوجائیں ۔اب انہیں کوئی بتائے کہ ایسی صورت حال اور عمر کے اس حصے میں آواز سے بھی ایک تصویر بنتی یے جو کبھی دھوکا نہیں دیتی چاھے ظاہری شکل کیسی ہی کیوں نہ ہو ۔ وہ تو جب انہوں نے عیادتی جملے بولنے کے لئے زبان کھولی تو چادر دانتوں سے نکل بھاگی اور لگا جیسے مجھ سے کہہ رہی یو " آپ سے کیا پردہ " ۔ خیر پھر انہوں نے میرے ہونے نہ ہونے کو خاطر میں کہاں رکھا ۔  سیانوں کا کہنا ہے کہ موت سے پہلے عیادت کے نام پر سب سے زیادہ تعزیتی قبریں خواتین کھودتی ہیں ۔

خیر کمرے میں آتے ہی پہلے تو ایک خاتون نے پھلوں کا شاپر بیڈ کے ساتھ والی ادویات کے لئے مخصوص ٹیبل ہر رکھ دیا ۔ شاپر میں آج کل کے موسمی پھلوں کا  منہ تک قبضہ تھا ۔ شاپر میں جگہ جگہ پھوڑے نکلے ہوئے تھے ۔ کینووں کی بہتات نے کیلوں کی سانس روک کر انہیں آدھ موا کردیا تھا ۔ دو کیلے شاپر کی منڈیر پر جاں بلب تھے اور شاپر پھاڑ کر نکلنے کو تیار تھے ۔ امرود نظر تو آرہے تھے مگر صاف لگ رہا تھا امرود اپنی سخت مزاجی کے کینووں کی بالادستی بلکہ چیرہ دستی سے بہت تنگ ہیں ۔

۔دوسری خاتون نے دس روپے کے نوٹ سے ریاض بھائی کے  ہاتھوں ، ماتھے اور کاندھوں کو چھلانے کے بعد سر پر اس نوٹ کو گھما کر صدقہ نکالا اور کچھ پڑھ کر ان پر پھونکا ۔ کچھ دیر میں اندازہ ہوگیا کہ دونوں نند بھاوج ہیں اور ساتھ آنے 

والے نند کے بڑے بھائی اور بھاوج کے شوہر نامدار ہیں گو کہ انہوں نے اپنا نام نہیں بتایا ۔ ویسے نام کچھ بھی رکھ لیں شوہر سے زیادہ  بے ضرر اور ہضم کوئی اور نام نہیں ۔  آئیں ! ذرا عیادت کا حال بھی سن لیں ۔

نند ریاض بھائی سے کسی قدر خفگی سے گویا ہوئیں اور بول               چلی گئیں 

ریاض بھائی ۔ حد ہوگئی غیریت کی ۔ کسی نے بتایا ہی نہیں کہ آپ اسپتال میں ہیں ۔ وہ تو کل ثریا سے بات ہوئی تو پتہ چلا ۔ میں تو ڈر گئی ۔ میں نے سوچ لیا تھا کل ضرور جاوں گی اسپتال ، ورنہ کل کلاں کو کچھ ہوگیا تو کہنے کو بات رہ جائے گی ۔ رات سے آپ کے لئے دعائیں کر رہی ہوں ۔ انہوں نے محلے کی مسجد میں بھی اعلان کرادیا یے ۔ ہر نماز میں آپ کے لیے دعائے صحت ہ

ورہی ہے ۔ 

اس کے بعد مریض کے چہرے ہر ایسی افسوسانہ اور قبرانہ نظر ڈالی کہ ریاض بھائی کو لگا کہ سامنے موت کا فرشتہ بیٹھا ہے ۔

بھاوج کہاں پیچھے رہنے والی تھیں ۔ رہی سہی کسر انہوں نے  ہوری کردی بلکہ دو ہاتھ آگے نکل گئیں : نہیں بھیا ، احتیاط بہت ضروری ہے ۔ 

نند کو مخاطب کرتے ہوئے  : وہ میں نے بتایا تھا ناں مشفق بھائی کا ۔ رات سوئے اور صبح آنکھ ہی نہیں کھلی ۔

پھر ریاض بھائی سے مخاطب ہوئیں : رات کو کوئی گھر والا رکتا یے کہ نہیں ؟

ریاض بھائی نے کہا : یہاں رکنے کا کوئی فائدہ نہیں ۔ باھر بیٹھنا پڑتا ہے ۔

نند نے پھر آگے بڑھ کر ریاض بھائی کے اوسان خطا کرنے کی پوری کوشش کی : اے بھیا ، اب یہ اسپتال والے بتائیں گے کہ فائدہ نقصان کیا ہے ۔ یاد نہیں آپ کی شادی کے تورس سال صداقت خالو کا کیا ہوا تھا ۔ رات اسپتال سے بیوی بچے گئے ۔ رات کو ان کی طبیعت خراب ہوئی ۔ لونڈے لپاڑے ڈاکٹر تھے اسپتال میں ۔ سنبھالا ہی نہیں گیا ان سے ۔ چٹ ہوگئے صداقت خالو  ۔ صبح بڑا لڑکا آیا تو مرے باپ کی شکل دیکھی ۔ 

اسی دوران راونڈ پر ڈاکٹر آگیا ۔ اس کے ساتھ نازک اندام ، آنکھوں میں شرارت بھری نرس کمرے میں آگئی ۔ ڈاکٹر ہاوس جاب پر تھا ۔ دونوں خواتین نرس کو دیکھ کر جلی مری جا رہی تھیں ۔ چیک اپ کے بعد دونوں چلے گئے ۔ نند نے پھر گند گھولنے کی کوشش کی ۔ اب یہ جو اسپتال والے چھوکرے چھوکرے سے سستے سستے سے ڈاکٹر رکھ لیتے ہیں اوپر سے یہ چلبلی نرسیں ۔ مریض کو انہوں نے خاک دیکھنا ہے ۔ خاک ہی ڈالتے ہوں گے ۔ 

ریاض بھائی کو اب اپنی بیماری کی شدت اور موت سے قربت کا اندازہ ہو چلا تھا ۔ ڈاکٹر کا آپریشن ، صبح شام  کے وزٹ اور اس پر یہ یقین دلانا کہ آپ کچھ دن بعد گھر ہوں گے ۔ سب بیکار تھا ۔ ہفتوں کا علاج پر خرچہ ، اہل خانہ کی تیمارداری سب ان نند بھاوج کی دس منٹ کی عیادت سے ہلکے  نکلے  ۔ جاتے جاتے بھاوج بولیں : فکر نہ کرنا بھیا ، اللہ تنکے میں جان ڈالنے والا ہے لیکن لکھی کو کون ٹال سکتا ہے بھلا ۔ پریشان بالکل بھی نہ ہونا ، اللہ بہتر کرے گا ۔ اور ویسے بھی ایک بات بتا دوں بچے سب کے پل جاتے ہیں ۔ وہ سب کا پالن ہار ہے ۔ تم اس کی بالکل بھی فکر نہ کرنا ۔ 

اس پوری تیمارداری میں صاحب نے ایک لفظ نہ بولا ۔ بس آتے جاتے مصافحہ کیا ۔ جب عیادت گزار چلے گئے تو ریاض بھائی کی حالت قابل دید تھی ۔ میں نے پوچھا کیسی لگی عیادت ؟ بولے : عیادت کے نام ہر زندہ تعزیت وہ بھی اپنی ، آج دیکھی ہے ۔ مجھے اندازہ ہو چلا تھا کہ مریض کس درجہ موت آگاہ ہو چلا ہے ۔ میں نے جاتے جاتے کہا : بس تم دیکھنا کل صبح تمھیں اسپتال والے ڈسچارج کردیں گے ۔ ریاض بھائی نے کہا : دیکھیں ڈسچارج  کرانے کون آتا ہے ۔ گھر والے یا فرشتہ ! 

میں  نے حوصلہ دیا تو گنگنائے لگے 

آج کی رات بچیں گے تو سحر دیکھیں گے

Article # 71اٹکل بچو فلسفیوں اور انڈا پھینٹو دانشورں سے بچو

Article # 71

 

 اٹکل بچو فلسفیوں اور انڈا پھینٹو دانشوروں سے بچو !

تحریر: !ظہر عزمی 

میں زندگی میں بہت سے لوگوں سے ملا یوں ۔ ایڈورٹائزنگ میں ہونے کے ناطے بڑے بڑے " کڑی ایٹیو " سے پالا پڑا ہے ۔ آس کے علاوہ عام زندگی میں بھی بڑے بڑے اٹکل بچو  فلاسفی اور انڈا پھینٹو دانشور عذاب جاں بنے رہے ہیں ۔ میں کم از کم اپنے تجربے کی بنیاد ہر یہ بات کہہ سکتا ہوں کہ میں اب تک جتنے بھی ناکام لوگوں سے ملا یوں ان میں ایک بڑی تعداد  انہی اٹکل بچو فلاسفئوں اور انڈا پھینٹو دانشوروں کی رہی ہے ۔ یہ مسلسل اس کوشش میں لگے رہتے ہیں کہ انہیں کوئی "کام" کا آدمی مل جائے اور اپنا حلقہ ارادت بڑھاتے جائیں۔

 کل میری ملاقات ایک ایسے ہی شخص سے یو گئی ۔ میرے دماغ میں تو خیر اس نے کیا ڈالنا تھا مگر میرے سر میں درد کر گیا ۔ پہلے تو میں ایسے لوگوں کی گفتگو سن کر احساس کمتری میں مبتلا ہو جایا کرتا تھا مگر اب خدا کا شکر ادا کرتا ہوں کہ میں ان کی "باتوں" کے لئے دونوں کانوں بیک وقت استعمال کرتا ہوں ۔

ایسے افراد کا مطالعہ بڑا واجبی سا ہوتا ہے وہ بھی یک طرفہ مراد یہ ہے کہ یہ صرف موافقت والے مضامین  پڑھتے ہیں اور اچھل کود شروع کردیتے ہیں ۔ کتاب پڑھ لیں تو دماغی ہاضمہ جواب دے جاتا ہے ۔ چند ایک مضامین پڑھ کر ہی یہ علامہ بن جاتے ہیں ۔ چرب زبان یوتے ہیں اس لئے نئے سننے والوں پر بڑی کاری ضرب لگاتے ہیں ۔ مزاجا ضدی اور ہٹ دھرم ہوتے ہیں ۔ بحث میں ذلیل سے زیادہ تذلیل ہر یقین رکھتے ہیں ۔ بڑے بڑے یونانی،  فرانسیسی اور انگلستانی ناموں اور موٹے موٹے رٹے رٹائے الفاظ کا ذخیرہ ان کے پاس ہوتا یے ۔ اپنا وقت کیا زندگی ضائع کر چکے ہوتے ہیں اور اپنی برتری ثابت کرنے کے لئے نا پختہ ذہنوں کو اپنا ہمنوا بنا کر ان کی زندگیاں تباہ کرتے ہیں ۔ ان کے ذہن کو مقفل کر کے سمجھتے ہیں کہ ان کے پیروکار اور مدح سراوں میں اضافہ ہو چکا ہے ۔ 

یہ چائے کے ایک کپ پر طوفان کھڑا کر دیتے ہیں لیکن ان کی اپنی زندگی مکمل سکوت کا شکار ہوتی ہے ۔ گفتگو میں ایسے ایسے فالسے ( فلسفے) ، توریاں (تھیوریاں) ،اور شکر قندیاں (مثالیں) وغیرہ لے کر آتے ہیں کہ ذہن کو جتنا پکا لیں کچھ بھی نہیں پک پاتا ۔ نتیجہ یہ ہوتا ہے کہ ساتھ بیٹھنے والا زندگی بھر ذہنی قبض یا پھر پیچش  کا شکار ہو جاتا ہے  ۔

اصل فلسفی اور دانشور تو کم گو ہوتے ہیں ۔ مخصوص افراد سے گفتگو کرتے ہیں ۔ دانشور وہ شخص ہوتا ہے جو معاشرے کی حقیقت کے بارے  تنقیدی سوچ  ، تحقیق اور عکاسی میں مشغول رہتا ہے اور معاشرے کے بنیادی مسائل کے حل کے لئے تجاویز پیش کرتا ہے ۔۔ فلسفی نکتہ ور ہوتا ہے ۔ یہ مطالعہ کے ساتھ کسی نتیجے ہر پہنچنے سے قبل تجزیہ کو لازم جانتا ہے ۔ یر بات کو عقل و دانش کی کسوٹی  ہر پرکھتا ہے ۔ یہ کسی ہر روب جمانے کی خاطر غور وفکر نہیں  کرتا ۔

۔دوسری جانب یہ رعب جماو ! اگر صبح کو کچھ پڑھ لیں تو شام تک پورے شہر میں الٹیاں کرتے پھرتے ہیں ۔ اگر  سننے والے کی گردن ہاں ہاں کی گردان کر رہی ہے تو ان سے شفیق کوئی نہیں اور اگر آپ نے کوئی نکتہ یا سوال اٹھا دیا تو ان سے زیادہ رکیک حملہ آور کوئی نہیں ۔ 

ہم بچوں کو اچھے برے کی تمیز سکھااتے ہیں ۔ اس کے پاس بیٹھو اس کے پاس نہیں ۔ یاد رکھیں ! اس معاشرے کی تباہی میں جاھلوں سے زیادہ پڑھے لکھوں کا ہاتھ ہے اور اس میں سب سے زیادہ تعداد ان  اٹکل بچو فلسفیوں اور انڈا پھینٹو دانشوروں کی ہے جو گلی گلی مارے مارے پھرتے ہیں ۔ اپنے بچوں کو ان سے بچائیں ۔ علم و حکمت کے نام پر ذہنوں کو ناکارہ کرنے کا کام سب سے زیادہ یہی اٹکل بچو فلسفی اور دانشور کر رہے ہیں ۔ یہ مستقبل کے معمار ذہنوں کو ناکارہ کر کے ایک صحت مند معاشرے کی تشکیل پر کاری ضرب لگاتے ہیں ۔ کچھ تو ایسے بھی ہیں کہ جو راسخ العقیدہ نوجوانوں کو ناسخ العقیدہ بنانے کی سر توڑ  کوششیں کرتے ہیں ۔ انہیں کوئی نہیں پکڑتا جو ذہن کھا جاتے ہیں ، نسل کھا جاتے ہیں ۔

 

،Aticle # 70جھوٹ بولنے کے عالمی مقابلے کا فاتح ایک بچہ رہا

 جھوٹ بولنے کے عالمی مقابلے کا فاتح ایک بچہ رہا

اس نے جو جھوٹ بولا وہ %100 سچ تھا 

تحریر : اظہر عزمی

کہتے ہیں ایک مرتبہ جھوٹ بولنے کا عالمی مقابلہ منعقد ہوا ۔ دنیا کے بڑے بڑے جھوٹے اس میں شریک ہوئے ۔ ایک سے ایک بڑا جھوٹ بولا گیا ۔ جج صاحبان ہر جھوٹ ہر ہمہ تن گوش تھے ۔ حاضرین بھئ جھوٹوں سے محظوظ ہو رہے تھے ۔ قریب تھا کہ مقابلہ ختم یو جائے کہ پروگرام کے میزبان نے ایک نام پکارا ۔ سب نے دیکھا کہ نام تو پکارا گیا ہے مگر وہ کون ہے نظر نہیں آرہا ۔

 کچھ دیر بعد ایک بچہ اسٹیج پر نمودار ہوا ۔ سب حیران تھے کہ یہ معصوم سا بچہ کیا جھوٹ بولے گا ۔ ایک سے ایک جھوٹا اپنے فن کا مظاہرہ کر گیا تھا ۔ کچھ نے تو واقعی پالا مار لیا تھا ۔ مقابلے میں شریک جھوٹوں نے بھئ بچے کو دیکھا تو ایک دوسرے کو دیکھ کر مسکرائے کہ اس نے کیا مقابلہ کرنا ہے ۔ اسے ابھی جھوٹ بولنا ہی کہاں آتا یوگا ۔ یہ فن تو ایک عمر گزارنے کے بعد آتا ہے ۔ بہر حال مقابلے کا اپنا ایک فارمیٹ تھا اس لئے بچے کو مقابلے میں شریک ہونا تھا ۔ سب کا خیال تھا کہ یہ فارمیلیٹی کی حد تک ہے ۔  

بچے نے اسٹیج پر آتے ہی جو جملہ کہا وہ حیران کن تھا : میں جھوٹ نہیں بولوں گا ۔ سب ہنسنے لگے ۔ کچھ نے کہا: بیٹا پھر یہاں کیا لینے آئے ہو؟ ۔ بچے میں کمال کا اعتماد تھا بولا : اب جو میں کہہ رہا ہوں سنیں ۔ آپ جھوٹ بولنے کے اس عالمی مقابلے میں میرا سچ کے ساتھ شریک ہونا سمجھ جائیں گے ۔ یہ کہنے کے ساتھ ہی  اس نے چند جملے انتہائی سادگی سے ادا کئے پھر کیا تھا ہر طرف سے داد و تحسین کے ڈونگرے برسنے لگے ۔ تالیوں کی گونج تھی کہ ختم ہونے کا نام نہیں لے رہی تھی ۔ بڑے بڑے جھوٹوں کے منہ لٹک گئے ۔ انہیں لگا کہ ان کی زندگی بھر کی جھوٹ گڑھنے کی محنت ایک بچے نے ضائع کر دی ۔

کچھ دیر بعد جیوری نے مقابلہ کے نتائج کا اعلان کیا اور اس سچ کو تاریخ انسانی کا سب سے بڑا جھوٹ قرار دیتے ہوئے بچے کو جھوٹ بولنے کے عالمی مقابلے کا فاتح قرار دے دیا ۔

آپ سوچ رہے ہوں گے کہ اس نے اپنی بات پر قائم رہتے ہوئے ایسا کیا سچ بولا ہوگا کہ جو سب سے بڑا جھوٹ بھی ہو ۔ 

اس نے بتایا : ایک ریلوے اسٹیشن پر دو عورتیں جو اندھی ، گونگی اور بھری بالکل بھی نہیں تھیں اور نہ ہی ایک دوسرے سے کبھی ملی تھیں ، ٹرین لیٹ ہونے کے سبب رات بھر انتظار گاہ میں ایک ہی بینچ پر بیٹھی رہیں اور انہوں نے ایک دوسرے سے بات نہیں کی ۔

اب آپ تالیاں تو نہیں بجائیں گے لیکن %100  سچ ہر مبنی اس جھوٹ سے انکار تو نہیں کر سکیں گے ۔

Article # 69 . کہیں وفات ، کہیں ولادت اور اسی بیچ رونا اور مسکرانا

 Article # 69

ایسے قصے کم کم ہوتے ہیں 

مگر جب ہوتے ہیں تو ہنسی روکے نہیں  رکتی !

                       
     تحریر : اظہر عزمی      

(ایک اشتہاری کی باتیں)

کبھی کبھی زندگی آپ کو ایسے مقام پر لا کر کھڑا کر دیتی ہے کہ آپ اندر سے انتہائی غمزدہ ہوتے ہیں لیکن کوئی بات ایسی بات ہوجاتی ہے کہ ہنسی روکے نہیں رکتی ۔ 

ہمارے ایک قریبی دوست کے والد انتقال ہوا ۔ تدفین کے دوسرے روز میں صبح ہی ناشتہ لے کر دوست کے گھر چلا گیا ۔ ہم تعزیت کے لئے آنے والے افراد کے ساتھ بیٹھے تھے ۔ فضا انتہائی سوگوار تھی ۔ زنانے سے کبھی رونے اور ہچکیوں کی آوازیں آرہی تھیں ۔ تعزیت کرنے والے افراد جب چلے گئے تو دوست کی والدہ  نے کہا کہ محلے میں کل کے سوئم کا کہہ آو۔ دوست بوجھل قدموں سے اٹھے ۔ ہم بھی ساتھ ہو لئے ۔ 

محلے میں جس گھر جاتے ، لوگ تعزیت کرتے اور دوست ایک ہی جملہ کہتے جو اللہ تعالی کی مرضی ۔ ہوتے ہوتے ہم ایک گھر پہنچے ۔ گیٹ کھٹکھٹایا تو اندر سے دوست کے والد کے ہم عمر صاحب نکل آئے ۔ سنجیدہ طبع انسان لگ رہے تھے ۔ بزرگوار آئے ، ہاتھ ملایا اور بولے :

منیر (ان کا بیٹا) تو گھر پر نہیں ۔ بس دعا کریں سب ساتھ خیریت کے ہو جائے ۔ 

دوست نے کہا : بس جی یہی تو بتانے آئے ہیں کل شام میں ہے ۔

 وہ حیرت زدہ یو گئے اور ذرا لہجے میں سختی لا کر بولے  : یہ آپ سے کس نے کہا ؟ 

 میں بول پڑا : کیسی باتیں کر رہے ہیں ۔ ہمیں کون بتائے گا ؟ ہمارے تو گھر کی بات ہے ۔

 بزرگوار کے چہرے پر ایک رنگ سا آکر رہ گیا : اچھا تو یہ آپ کے گھر کی بات ہے ۔ ہمیں تو آج ہی پتہ چلا ۔

دوست غمزدہ ضرور تھا مگر اب اس کا صبر کا پیمانہ بھی لبریز ہو رہا تھا : اگر میرے گھر کی بات نہ ہوتی تو پورے محلے میں کیوں کہتا ۔ 

بزرگوار چونک گئے : کیا کہا ؟ ذرا پھر سے کہیئے گا ۔ مطلب اب سب کو بتا آئے کہ کل شام میں ہے ۔ میں نے کہا : تو کیا آپ کے دستخط کرواتے پھر بتاتے۔ بزرگوار کا بس نہیں چل رہا تھا کہ کیا کریں ، بولے :  شریفوں کے محلے میں اس طرح کی باتیں ؟ 

میں بھی برہم ہوگیا: تو کیا شریف محلوں میں لوگ مرتے نہیں ہیں ۔ جو آیا ہے اس نے تو جانا ہے ۔ بولے : میاں ذرا ہوش کے ناخن لو ۔ ہم زندگی کی دعائیں مانگ رہے ہیں اور تم مرنے کی باتیں کر رہے ہو ۔۔۔ کچھ تو خوف خدا کرو۔

میں نے اور دوست نے ایک دوسرے کو دیکھا ۔ہم دونوں ہی کی سمجھ میں بزرگوار نہیں آرہے تھے ۔ تصدیق کے لئے کرواہٹ بھرے نرم لہجے میں بولے :  یہ کل شام والی بات آپ تک پہنچی کیسے ؟ 

 دوست جل گیا : ہمیں کل شام کا کون بتائے گا ؟ ہم چاھتے تو پرسوں بھی کر سکتے تھے ۔ چلیں آپ کل شام تو آئیں  گے ناں !

 بولے : میاں تہذیب بھی کوئی چیز ہوتی ہے ۔ میں اچھا لگوں گا اس عمر میں وہاں جاتا ہوا ؟

 اب میں نے کہا : نہیں اس عمر میں نہیں جائیں گے تو کب جائیں گے ۔ دیکھ لیں اگر آپ نہ آئے تو آپ کی باری پر کون آئے گا ۔ 

بزرگوار تقریبا چلا کر بولے : میاں اس عمر میں میری باری ؟ تمھیں شرم نہیں آرہی یہ کہتے ہوئے۔ اگر گھر میں کسی نے سن لیا تو کیا ہوگا ۔ اب آپ دونوں حضرات ایک لمحے بھی یہاں نہیں ٹھہریں گے ورنہ مجھے کچھ ہو جائے گا ۔

 اسی اثنا میں منیر بھی آگیا ۔ بزرگوار نے بیٹے کو دیکھتے ہی کہا : منیر میاں آپ نے تو کمال ہی کردیا ۔ یہ کل شام کا سب کو بتا آئے ۔ایک کام کریں مسجد میں اعلان  کروادیں ۔ منیر ہکا بکا ہم سب کو دیکھے جارہا تھا ۔ صورت حال کو ٹھنڈا کرنے کے لئے اس نے پہلے تو والد کو اندر بھیجا پھر پوچھا کہ ہوا کیا ؟ دوست نے بتا دیا کہ کل والد صاحب کا سوئم ہے اس کی کہنے آئے تھے ۔ منیر نے اپنا سر پکڑ لیا ۔ 

ہم دونوں حیران و پریشان کے منیر کو کیا ہوا ؟ منیر نے بتایا کہ بابا دو تین دن سے بہت پریشان ہیں ۔ ہم نے ان کو تمھارے والد صاحب کے مرنے کا بھی نہیں بتایا ۔ دوست کو افسوس ہوا بولا : سوری منیر پتہ نہیں ہم لوگ نہ جانے کیا کیا کہہ گئے ۔ منیر نے بتایا کہ اصل میں اس کے ہاں پہلے بچے کی ولادت متوقع ہے ۔ اسپتال والے کل شام  آپریشن کا کہہ رہے ہیں ۔ بابا جب سے جاءنماز پر ہی ہیں ۔ دعائیں مانگے جا رہے ہیں ۔ بس جو ہو ساتھ خیریت کے ہوجائے ۔

اب نہ پوچھیں ہمارا کیا حال تھا ہنسی تھی کہ روکے نہیں رک رہی تھی ۔

Article # 68 ایک بچے کی ای میل ، اللہ میاں کے نام ! لوگ مجھے آپ سے ڈراتے کیوں ہیں ؟

Article # 68

ایک بچے کی ای میل ، اللہ تعالی کے نام

میرے پیارے اللہ  

لوگ مجھے آپ سے ڈراتے کیوں ہیں

تحریر : اظہر عزمی 

(ایک اشتہاری کی باتیں)

میرا نام مصطفی حسن ہے۔ فورتھ کلاس میں پڑھتا ہوں۔ پڑھنے میں بس ٹھیک ہی یوں۔ پاس ہوجاتا ہوں۔ میری ایک چھوٹی بہن بھی ہے جو بہت ہی تیز ہے۔ میری ہر چیز لے لیتی ہے۔ اس کی کسی چیز کو ہاتھ لگا لوں تو خوب شور کرتی ہے اور پھر مجھے سب ہی ڈانٹتے ہیں۔ ہاں میں کبھی کبھی شرارت کرتا ہوں لیکن اگر میں اب شرارت نہیں کروں گا تو کب کروں گا؟ بس اسی وجہ سے میں یہ میل لکھ رہا ہوں۔

میرے پیارے اللہ میاں، مجھے سب تو نہیں لیکن بہت سارے لوگ آپ سے ڈراتے ہیں۔ کچھ بہت ڈراتے ہیں، بہت confuse ہوں۔ ایک دن میں نے بہن کی پینسل لے لی۔ اس نے شور کردیا۔ میں نے کوئی چوری تھوڑی کئ تھی۔ وہ بھی تو میری چیزیں لے لیتی ہے۔ میں کچھ کہوں تو کہتے ہیں کہ چھوٹی بہن ہے۔ تو کیا میں چھوٹا نہیں؟ اچھا آپ کو پوری بات تو بتا دوں اصل میں میری پینسل sharp نہیں تھی۔ Sharpner مل نہیں رہا تھا۔ پینسل سامنے ہی تو رکھی تھی۔ اٹھا لی۔ مجھے سب نے کہا یہ بری بات ہے۔ پوچھ کر لیتے۔ ایسا کرنے سے اللہ میاں ناراض ہو جاتے ہیں۔ ارے میں نے پینسل چوری تھوڑی کی تھی۔ سمجھا دیتے۔ میں بھی اصل بات بتا دیتا۔ کسی نے میری سنی ہی نہیں۔ بس آپ سے ڈرانا شروع کر دیا۔ اللہ میاں آپ کو تو سب پتہ ہوتا ہے کہ کسی دل تک میں کیا ہے۔

ایک دن میں کرکٹ کھیلنے گیا۔ نماز پڑھنے میں دیر ہو گئی۔ چاچی جان نے کہا نماز پڑھو ورنہ جو نماز نہیں پڑھتا اس کی قبر میں بچھو ( مجھے پتہ نہیں یہ کیا ہے) اور سانپ آتے ہیں۔ پتہ ہے اللہ میاں، میں ڈر گیا۔ رات کو بابا سے لپٹ کر سویا۔ میں نے نماز پڑھنے سے کب منع کیا ہے لیکن ڈرا ڈرا کر نماز کیوں پڑھوا رہے ہیں۔ بہت دنوں تک تو نماز پڑھتے پڑھتے بچھو اور سانپ کا خیال آجاتا۔

ایک مرتبہ میرے کزن نے مجھے مارا۔ مجھے بھی غصہ آگیا۔ سب نے کہا وہ چھوٹا ہے۔ ایسی باتوں سے گناہ ملتا ہے، اللہ میاں سزا دیتے ہیں۔ سمجھا پاتے نہیں ہیں بس آپ سے ڈرانا شروع کردیتے ہیں۔ اللہ میاں پہلے سوری کرنے کے بعد بتا رہا ہو ایک دن میں نے کہہ دیا اللہ میاں کیا ہر وقت غصے میں رہتے ہیں، ناراض رہتے ہیں؟ دیکھیں اللہ میاں میں نے بتانے سے پہلے سوری کر لی۔ امی نے خوب ہی ڈانٹا۔ میں نے بھی توبہ کی۔ آپ بتائیں میرا کیا قصور؟ سب یہی کہتے رہتے ہیں۔ اب میں تو یہی سوچوں گا ناں ؟

بس میرا ایک دوست ہے وہ کہتا ہے میرے اللہ میاں بہت پیارے ہیں سب سے پیار کرتے ہیں۔ میں جانتا یوں ہم سب کے اللہ میاں آپ ہی ہیں۔ وہ کہہ رہا تھا کہ اس کی امی نے بتایا کہ جس طرح میں تمھارا خیال کرتی ہوں اور پیار کرتی ہوں۔ دنیا میں مجھ سے بھی اچھی امیاں ہوتی ہیں۔ اس طرح کی 70 امیوں سے بھی زیادہ اللہ میاں اپنے بندوں سے پیار کرتے ہیں اور بچوں سے تو بہت ہی زیادہ پیار کرتے ہیں کیونکہ وہ دل سے جو سچے ہوتے ہیں۔ سب لوگ بچوں سے بچوں کی طرح کیوں بات نہیں کرتے۔ وہ ہمیں اپنے برابر کا سمجھ کر کیوں سمجھاتے ہیں۔

میں چھوٹا ہوں مگر اتنا چھوٹا بھی نہیں۔ کتنی بار کوئی گھر کی بیل بجائے تو مجھ سے کہا جاتا ہے کہ جاو کہہ دو گھر پر نہیں۔ موبائل کی بیل بجتی یے تو کہہ دیتے ہیں کہ میں تو وہاں ہوں جب کہ گھر پر ہوتے ہیں۔ کیا یہ جھوٹ بولنا نہیں۔ مجھ سے کہتے ہیں اللہ کے بندوں سے محبت کرو اللہ میاں خوش ہوتے ہیں تو ان سے کہیں یہ خوشی وہ خود کیوں نہیں لیتے۔ غریبوں کا خیال رکھو۔ یہ اللہ کے بہت قریب ہوتے ہیں تو پھر ان غریب لوگوں کے خود قریب کیوں نہیں ہوتے۔ کہتے ہیں اللہ کے لئے سب برابر ہیں لیکن اگر کوئی غریب پانی مانگ لے تو گھر کا سب سے پرانا گلاس کیوں ڈھونڈتے ہیں اور بھر بعد میں اس کو دھوتے ہیں یا پھر اسے کونے میں رکھ دیتے ہیں۔

اللہ میاں بڑے ہمیں بے وقوف سمجھتے ہیں۔ انہیں پتہ نہیں کہ جسے وہ ڈرا کر سمجھا رہے ہیں وہ دیکھ بھی رہا ہے۔ ۔ ۔ اور ہاں اللہ میاں یہ بھی بہت کہتے ہیں اللہ میاں دیکھ رہے ہیں تو کیا آپ ان کو نہیں دیکھ رہے؟ کیا سارے کیمرے بچوں پر ہی لگے ہوئے ہیں؟

گھر آکر لوگوں کی برائیاں کرتے ہیں اور مجھ سے کہتے ہیں برائی کرنا بری بات ہے۔ آپ مجھے بتائیں خود غلط ہو کر مجھے صحیح کا بتانا بری بات نہیں ہے کیا؟ ہم بچے بات کہنے سے نہیں دیکھنے سے سیکھتے ہیں۔ اچھی بات کہنے کے لئے اچھائی خود میں بھی تو ہونی چاھیئے۔ میں بار بار ڈر لکھ رہا ہوں لیکن میں آپ کو ایک بات بتاوں۔ مجھے معلوم ہے آپ اپنے بندوں خاص طور پر بچوں سے بہت پیار کرتے ہیں۔ اسی لئے تو میں اپنی ساری باتیں آپ سے کر رہا ہوں۔ اللہ میاں جیسا آپ چاھتے ہیں میں ویسا ہی بننا چاھتا ہوں لیکن خوشی خوشی، کسی ڈر کے بغیر۔

آخر میں میں سوچ رہا تھا کہ کس ای میل ایڈریس پر یہ میل کروں۔ سب کچھ ہی تو آپ کا ہے۔ آپ کہاں نہیں۔ سوچا آپ کے کسی بھی گھر پر پرنٹ آوٹ رکھ آتا ہوں لیکن اللہ میاں یہ مسجدیں تو لوگوں نے بانٹ لی ہیں بالکل ویسے ہی جیسے ہمارے دادا کے مکان کو بانٹ لیا گیا ہے۔ سوری اللہ میاں میں یہ کہنا نہیں چاہ رہا تھا

آپ کا مصطفی حسن 

کلاس فورتھ ، سیکشن سی 

(توجہ : یہ ایک بچے کے حقیقی خیالات ہیں جنہیں پوری احتیاط کے ساتھ اسی کے انداز میں تحریر کرنے کی کوشش کی گئی ہے۔ یہ بھی ایک المیہ ہے کہ بچے اب اردو نہیں لکھ پا رہے ہیں بہرحال اس کی باتیں قابل توجہ ہیں۔)

Article # 67 برسات میں لالو کھیت کی چائے ، سموسے اور واٹرپمپ کے پکوڑے

Article # 67

برسات میں لالو کھیت کی چائے ، 
  سموسے اور واٹرپمپ کے  پکوڑے

 ایک دوست کا ساتھ اور نیت کی بات !

تحریر : اظہر عزمی
(ایک اشتہاری کی باتیں)

بارش کی ٹپ ٹپ ہو تو گذرے دنوں کی منڈیر پر یادوں کے پرندے آ بیٹھتے ہیں ۔

جب انٹر میں تھے تو اسی وقت دو دعائیں مانگ لی تھیں ۔ پہلی یہ کہ کبھی موٹر سائیکل نہیں لوں گا اور کبھی کلرکی نہیں کروں گا ۔ آج تک موٹر سائیکل خریدی نہ کبھی چلائی ۔ کلرکئ کا بھئ بتا دوں ۔ اس سے مراد تضحیک یا ملازمت کو کم ترین ثابت کرنا نہیں بلکہ اصل بات ( جو شاید ہنسنے کی ہی ہے) یہ ہے کہ مجھے اسٹیپل کر کے پیپر فائل کرنا آج تک نہیں آتا ۔ جب تک آس پاس کاغذ نہ بکھرے ہوں کام میں مزہ نہیں آتا ۔ یہ الگ بات ہے کہ جب کام کا کاغذ ڈھونڈنا ہو تو وہ مل کر نہیں دیتا اور آج بھی خود کو خوب سناٹا ہوں ۔

پہلے بھی کہہ چکا ہوں ماضی لکھنے بیٹھو تو قلم قابو میں نہیں رہتا ۔ ذہن جہاں چاھتا ہے اس کو لئے پھرتا ہے ۔  ملازمت کا زیادہ تر عرصہ ڈیفینس اور کلفٹن کے علاقوں میں گذرا ہے ۔ ابھی دو تین سال ہی ہوئے تھے ۔ سارا سفر بسوں اور ویگنوں میں تھا ۔ دفتری اوقات میں جہاں گھنیرے بادل آئے ۔ ہم جھوم اٹھے ۔ بادل گرجے اور برسے تو موسم نے انگڑائی لی ۔ ساری خوشی اپنی جگہ موسم حسین ہے لیکن ڈیفینس یا کلفٹن سے اس طوفانی بارش میں گھر کیسے جائیں گے ۔ 

لیجئے یادوں میں آفس کے نمبر پر اس کی کال آگئی یے ۔

 وہ :کیسے گھر جائے گا ؟ 

میں : ٹاور سے یہاں ڈیفینس آئے گا ، سیدھا گھر نکل جائے میں کسی طرح آہی جاوں گا ۔

وہ : زیادہ ڈرامے نہیں کر ۔ باہر نکل کے دیکھ کتنی تیز بارش ہے ؟  تیرے پاس کون سی سواری ہے  کنجوس ۔ ایک موٹر سائیکل لے لے ۔

 مجھے غصہ سا آجاتا یہ تو ہمیشہ میری موٹر سائیکل  کو ہی کیوں لے کر بیٹھ جاتا ہے ۔ غصے میں دیکھتا تو کہتا اچھا اپنی تقریر چھوڑ ۔ میں تیری طرف آرہا ہوں ۔ کبھی کبھی تو میرا کہا مان جاتا اور نہ آتا لیکن کبھی میری ایک نہ سنتا ۔ موٹر سائیکل پر بھیگتا چلا آرہا ہے ۔ میں آفس کے گیٹ پر ہی ہوتا ۔ موٹر سائیکل بند نہ کرتا ۔ اشارے سے کہتا آ جا ۔

 سچی بات یہ ہے تیز بارش میں موٹر سائیکل پر بیٹھ کر بڑا مزہ آتا ۔ کالج کے دن یاد آجاتے ۔ ہم دونوں خوب ہی انجوائے کرتے۔ راستے میں اگر کوئی گاڑی تیز گذرتی اور پانی کے چھینٹوں کی سلامی دیتی تو پھر جو صلواتیں سناتا کہ آس پاس میں کوئی سن لیتا تو ہنس کر رہ جاتا  جو اس کے منہ میں آتا بکتا چلا جاتا ۔ 

 سالے ! گاڑی چلانا سیکھ لی ۔ تمیز بھئ سیکھ لیتا ۔ جیب میں پیسہ ہو تو تمیز دماغ میں کہاں رہتی ہے

 کچھ دیر تو اس کا پیچھا بھی کرتا ۔ میری جان نکل جاتی ۔ موٹر سائیکل ہلکی سی سلپ ہوئی تو دونوں ہی جائیں گے ۔ میں کہتا دیکھ یہ سب کرئے گا تو اتر جاوں گا ۔ قہقہہ لگاتا ۔ تو اور اترے گا ؟ یہ کہہ کر مجھے ڈرانے کے لئے ہلکی سی اسپیڈ بڑھا دیتا ۔ ڈیفینس سے پہلے ایف ٹی سی آتے ۔ سندھی مسلم پر رکتے ۔ میں پان لیتے اور وہ ایک یا دو سگریٹ ۔ کہتا اب سگریٹ پی کر چلیں گے ۔ میں کہتا چل یار راستے میں پیتے چلنا ۔ او بھائی ! یہ تیرا پان نہیں کہ منہ میں دبایا اور جہاں چاھا راستہ میں پیک مار دی ۔ راستہ بھر تفریح رہتی ۔ جیل چورنگی سے تین ہٹئ سے ہوتے لالو کھیت ڈاک خانے پہنچتے ۔ پانی بھرا ہوتا ۔ کہتا اب چائے پی کر چلیں گے ۔ میں کہتا پگلا گیا ہے ۔ گھر چل کر پی لیں گے ۔ کہتا ابے جاہل بارش انجوائے کر ۔۔۔۔ یہ کراچی میں ہوتی ہی کب ہے ؟ 

ڈاک خانے پر چائے پیتے تو کہتا سموسے کھائے گا ؟ میں وہاں کی گندگی دیکھ کر الجھ جاتا ۔ بالوں سے ٹپکتا پانی چائے میں گر رہا ہوتا اس پر پتہ نہیں کس تیل میں بنے سموسے لیکن وہ لے آتا ۔ گرم گرم سموسہ منہ میں رکھتے ہوئے کہتا ڈیفینس میں جاب کر کے تو بڑا برگر بنتا جا رہا ہے ۔۔۔ لے کھا کچھ نہیں ہوگا ۔

موٹر سائیکل تو وہ ایسے چلاتا جیسے ڈرائنگ روم میں بیٹھا کسی سے باتیں کر رہا ہے ۔ موڈ میں یوتا تو بارش کا کوئی گانا گنگنائے لگتا ۔ گانے سے وقت بچتا تو مجھ سے باتیں کرنے لگتا ۔ تیز بارش میں اس کی کوئی بات پوری طرح سمجھ میں نہیں آتی ۔ میں اس کی ہر بات کے جواب میں دو تین مخصوص جواب دیتا ۔ اچھا ۔۔۔ ہاں یہ تو ہے۔۔۔ یہ تو تو ٹھیک کہہ رہا ہے ۔۔۔۔ ایسا ہی ہوتا ہے ۔ جب کسی بس ، ٹرک یا ویگن سے ملاکھڑے کا خدشہ ہوتا تو پھر میں چلا کر کہتا :

 دیکھ ویگن سے بچا۔ ٹرک کو تو دیکھ لے ۔

 وہ :  ابے سب دیکھ رہا ہوں اندھا تھوڑی ہوں ۔

 آپ اس کے موٹر سائیکل چلانے پر حرف زن ہوں تو وہ موٹر سائیکل کو اور زن کر دیا کرتا ۔ میرے خیال سے وہ rough چلاتا تھا لیکن اگر کوئی موٹر سائیکل والا فیملی کے ساتھ تیز جا رہا ہوتا تو کہتا تو ذرا اس کے بھرم دیکھ ۔ یہ نہیں دیکھ رہا کہ بیوی بچے ساتھ بیٹھے ہیں ۔ میں کہتا تو اپنی فکر کیوں نہیں کرتا تو زور سے قہقہہ لگاتا ارے اپنے کون سے بیوی بچے ہیں ۔ جب ہوں گے تب کی تب دیکھی جائے گی ۔

رحم دلی کوٹ کوٹ کر بھری تھی ۔ ایک مرتبہ جب کریم آباد کا نیا پل نہیں بنا تھا ۔ عین پل کے درمیان میں ایک لڑکا اور بزرگ کھڑے نظر آئے ۔ان کی موٹر سائیکل بارش کی وجہ سے بند ہوگئی تھی ، رک گیا ۔ تیز بارش تھی ۔ کافی دیر لڑکے کے ساتھ موٹر سائیکل کو اسٹارٹ کرنے کی کوشش کرتا رہا ۔ بھر ایک دم ساتھ کھڑے بزرگ کا خیال آیا ۔ لڑکے سے پوچھا یہ تیرے کون ہیں ؟ اس نے بتایا کہ دادا ہیں ۔ غصے میں آگیا، کہنے لگا اتنی کھٹارا موٹر سائیکل ہر دادا کو لے کر نکلا ہی کیوں ؟  لڑکا بھی ذرا ٹیڑھا تھا بولا تم کون ہوتے ہو مجھے سمجھانے والے ۔ تو تو میں میں شروع ہوگئی ۔ عجب تماشا تھا میں اور دادا بیچ بچاؤ کرا رہے تھے ۔ بارش نے تھمنا تھا نہ وہ تھمی ۔

 خیر طے یہ ہوا کہ پہلے وہ دادا کو کریم آباد  کے پل کے نیچے لے کر جا رہا ہے  ۔ وہ لڑکا اور میں موٹر سائیکل گھسیٹتے آئیں گے ۔ تیز بارش میں ہم دونوں  نیچے آئے ۔ اس دوران اس نے مکینک بھی ڈھونڈ لیا ۔ دادا کو مکینک کے پاس چھوڑا ۔ ہم دونوں موٹر سائیکل لے کر وہاں پہنچے ۔ موٹر سائیکل اسٹارٹ ہوئی وہ دونوں چلے گئے  پھر ہم نے گھر کی راہ لی ۔ میں نے کہا تو بیکار میں اس لڑکے سے اٹک رہا تھا ۔ بولا جاہل ہے سالا ۔  

واٹر پمپ پہنچتے پہنچتے کہتا یار تھوڑے پکوڑے ہو جائیں ۔ میں ہاتھ جوڑ لیتا تجھے خدا کا واسطہ گھر چل اور آئندہ سے نان تو مجھے بارش میں لینے نہ آنا لیکن وہ مجھ سے پوچھتا تھوڑی تھا بس بتاتا تھا کہ پکوڑے کھانے ہیں ۔

آج کل وہ امریکا میں اپنے بیوی بچوں کے ساتھ رہ رہا ہے ۔ اب تو بات کرنا بہت آسان ہوگئی ہے ۔ کل رات میں نے کہا سموسے اور پکوڑے کھائے گا ۔۔۔ آجا ۔ بولا ابے کیا لالو کھیت میں ایسے ہی پانی جمع ہوتا ہے بارش کا ۔ میں نے کہا کیوں کیا تو یہاں drainage system  لگوا گیا ہے ۔ بولا تم لوگ نہیں بدلو گے ۔ میں نے کہا تو بدل گیا ہے کیا ؟ بارش میں وہاں کوئی موٹر سائیکل والا ملتا ہے کیا ؟ سنجیدہ ہو گیا ۔ یار ترس گیا ہوں ان چھوٹی چھوٹی نیکیوں کے لئے ۔  کہنے لگا دیکھ نیکی کرنے کا کوئی بھی موقع ملے کبھی ضائع نہ کر ۔ تو نہیں کرے گا تو اوپر والا وہ کام کسی اور کے سپرد کر دے گا۔ میں نے کہا تیری سوچ آج بھی اندر سے وہی ہے ۔ بولا  سوچ کیا ہے ؟  نیت ۔  بس نیٹ ٹھیک رکھ !!!

Article # 66 میں اسے روکتا رہ گیا پر وہ رکا نہیں ۔ اسے جانے کی جلدی تھی ۔

Article # 66

میں اسے روکتا رہ گیا پر وہ رکا نہیں 

اسے جانے کی جلدی تھی  !

تحریر: اظہر عزمی

(ایک اشتہاری کی باتیں) 

میری اس سے پہلی ملاقات فروری 1991 میں ایک تقریب میں ہوئی تھی ۔ ایک موقع ہر ہم ساتھ ہی بیٹھ گئے ۔ واپسی پر بھی ساتھ ہی ہولئے ۔ ہماری دوستی وقت کے ساتھ ساتھ بڑھتی گئی ۔ دوستی تھی اچھا برا وقت ساتھ دیکھا ۔ لگا ہم ایک دوسرے کو عرصے سے جانتے ہیں ۔ ذہنی تال میل ایسا کہ نظر کا کہا سمجھ جائیں ۔ویسے اس میں زیادہ کمال اس کا تھا کیونکہ زیادہ تر اسے ہی سمجھنا پڑتا تھا ۔ عجیب دوستی رہی نہ اس نے کبھی کسی سے میری کوئی شکایت کی اور نہ ہی میں کبھی حرف شکایت زبان پر لایا ۔ اگر کبھی کوئی اختلاف ہو بھی جاتا تو آپس میں بیٹھ کر حل کر لیتے ۔ حل بھی کیا کر لیتے جس کو احساس ہوتا کہ وہ غلطی پر ہے ۔وہ کال کر لیتا ہے جس میں کوئی معذرت یا معافی تلافی نہ ہوتی بلکہ وہ بات ہی نہ ہوتی ۔ ادھر ادھر کی بات کرتے اور بات ختم ہوجاتی ۔ ہم دونوں کو ایک دوسرے کی عزت نفس بہت عزیز تھی ۔ اس لئے معذرت یا سوری جیسے الفاظ سے نا آشنا تھے ۔

اس تعلق میں جو چیز میں نے اس سے سیکھی وہ صبر تھا ۔ میں مزاجا جلد باز ہوں ، تند خو یوں یا تھا ۔ میں بہت صبر سے صبر  سیکھتا چلا گیا ۔ میں اس سے گھنٹوں باتیں کرتا رہتا ۔ اپنے قصے لے کر بیٹھ جاتا اور وہ سنتا رہتا ۔ اکثر اپنے پرانے قصے دھراتا تو وہ اتنی ہی دلچسپی سے سنتا جیسے میں پہلی بار سنا رہا ہوں ۔ وہ خاموش طبع تھا اور میری زبان اس کے سامنے تالو سے نہ لگتی وگرنہ سب کے سامنے تو میں بھی بڑی مشکل سے کھلتا ہوں۔ وہ مکمل غیر سیاسی تھا ۔ اپنے دل کی بات بڑی مشکل سے کہتا تھا ۔ وہ بھی میری طرح کبھی کسی کا دل سے برا نہیں چاھتا تھا ۔ میں تو اگر کسی سے ناراض ہوتا تو بک جھک لیا کرتا تھا وہ تو یہ بھی نہ کرتا تھا ۔ کینہ ، بغض ،عداوت ، حسد اور لالچ کا ہم دونوں کو عارضہ نہ تھا ۔ یہ اور بہت سی ایسی خوبیاں تھیں کہ جن کی وجہ سے میں اس کا احترام کرتا تھا ۔

اکثر یہی کہتا کہ لوگ برے ہوتے ہیں لیکن اچھا نظر آنے کی کوشش کرتے ہیں ۔ آپ رحم دل ہو مصنف مزاج ہو لیکن برا نظر آنے کے لئے ہر جتن کرتے ہو ۔ لباس سے لے کر گفتگو تک کوئی اچھا تاثر چھوڑنے کی کوشش نہیں کرتے بلکہ اگر یہ احساس یو جائے کہ Postive Image بن رہا ہے تو کم از کم چہرے کے تاثرات سے ہی اسے Negative کر دیتے ہو ۔ میں جواب میں یہی کہتا کہ اگر سامنے والا ایک حد سے زیادہ میٹھا بولنے لگے تو مجھے کڑواہٹ محسوس ہونے لگتی ہے ۔ مجھے شروع سے کھرے لیکن سچے لوگ پسند ہیں ۔ میرے جواب پر صرف ہلکی سی مسکراہٹ آتی ۔  

سب ٹھیک چل رہا تھا  ہماری دوستی کے 25 سال مکمل ہونے  میں 15 دن رہ گئے تھے  کہ جنوری 2016  میں اس نے چلنے کا کہہ دیا۔ میں تو ہکا بکا رہ گیا ۔ پیروں سے زمین نکل گئی۔ کبھی یہ سب تو سوچا ہی نہیں تھا ۔

" کیا ہوا ؟ کوئی بات بڑی لگ گئی ۔ میں نے کچھ الٹا سیدھا کہہ دیا " جواب میں اداسی بھری مسکراہٹ تھی ۔ 

" نہیں ایسا کچھ نہیں ، بس مجھے چلنا ہے "

میں نے بہت سمجھایا اس نے کہا "دل تو میرا بھی نہیں چاہ رہا مگر مجبوری ہے " 

میں رو پڑا ۔ اس نے کہا " رویا نہ کرو ۔ مجھے بہت تکلیف ہوتی ہے " ۔ میں نے آنسو پونچھ لئے مگر دل روتا رہا ۔

میں نے پہلی مرتبہ اپنے اور اس کے تعلق سے لوگوں سے بات کی ۔ اسے سمجھائیں جانے کی باتیں وہ بھئ تقریبا 25 سال بعد ۔ جانا  تھا تو پہلے جاتے ؟

میری کوششوں کا اتنا اثر ہوا کہ جانا رک گیا ۔ دسمبر 2016 میں اس نے کہا کہ اب جانا منسوخ کردیا گیا ہے ۔ میں نے سکھ کا سانس لیا لیکن یہ سب عارضی تھا ۔ اگست 2017 میں پھر اس کو جانے کی لگ گئی ۔ اب کہ مجھے بھی لگا کہ میرے روکے سے بھی نہ روکے گا ۔

میں پھر بھی اسے روکتا رہ گیا ۔ یر ایک کی طرف امید بھری نظروں سے دیکھتا رہا کہ شاید کوئی کام آجائے مگر سب نے ہاتھ اٹھا لیا ۔ میں نے دعا کو ہاتھ اٹھا لئے ۔ میں نے کہا "

چلو میں بھی ساتھ چلتا ہوں ۔ جیسے بھی ہوگا مل بانٹ کر سفر کاٹ لیں گے "

اس نے کہا  " نہیں اگر دوستی ہے تو اب تم دوستی نبھاو ۔ میرے کچھ کام تمھارے ذمے ہیں وعدہ کرو ان سے کبھی دست بردار نہیں ہو گئے ۔ کبھی مجھے مایوس نہیں کرو گے ۔ کبھی غافل نہ ہو گے"

 پھر اکتوبر 2017 کو دوستی کا یہ رشتہ کچے دھاگے کی طرح ٹوٹ گیا ، اس نے ابدی آرام گاہ کو جا بسایا اور میں کچھ نہ کر سکا ۔ کر بھی کیا سکتا تھا ۔

اب یہ حال ہے کہ میں اسے صرف سوچتا ہوں اس کا ذکر کسی سے نہیں کرتا ۔ بقول حسن رضوی مرحوم ( شعر میں ترمیم کے ساتھ)

آنکھوں سے نہ پڑھ لے کوئی چہرے کی اداسی 
اس  ڈر  سے کبھی  ذکر  "ہم تیرا "  نہیں  کرتے

اگر کبھی کوئی اس کا تذکرہ کرتا بھی ہے تو چاھتا ہوں کہ زیادہ دیر نہ ہو یا کم از کم مجھے شریک نہ کیا جائے ورنہ میں رو پڑوں گا اور میں جانتا ہوں اسے میرا رونا بالکل بھی پسند نہیں آئے گا ۔

اسی لئے تو میں رویا نہیں بچھڑتے سمے 
تجھے  روانہ کیا ہے ،  جدا  نہیں  کیا  ہے      (علی زریون)

وہ جاتے جاتے دوستی کا حق ادا کر گیا ۔ مجھے صبر کرنا سکھا گیا ہے ۔ ملے گا تو بتاوں گا کہ تمھارے جانے کے بعد مجھے صبر کرنا آگیا ہے لیکن میرا خیال اسے اس کی خبر تو ہو گی ۔

میں کب سے اس دوستی پر لکھنے کا سوچ رہا تھا مگر کیا کروں ذہن سے پہلے آنکھیں نم ہو جاتیں ۔ یادوں میں گم ہو جاتیں ۔ لکھنے کو بیت کچھ ہے مگر میں اس سے زیادہ خود میں ہمت نہیں پاتا ۔ اس کے معاملے میں بہت کمزور ثابت ہوا  یوں ۔ رشتہ جتنا مضبوط ہو جائے آپ اتنی ہی کمزور ہوتے چلے جاتے ہیں ۔