Saturday, 23 March 2019

Client kay qissay ... Mazay mazay kay (3)


Article # 4

(کلائنٹ کے قصے ۔۔۔ مزے مزے کے (3

ہمارا پہلا ٹی وی کمرشل
اداکار طلعت حسین کی آواز ۔۔۔ پھر ریکارڈنگ غائب

تحریر : اظہر عزمی
(ایک اشتہاری کی باتیں)
ہمارے ایڈورٹائزنگ کیریئر کا آغاز 1988 میں ہوا۔ پہلی ملازمت سے ایک ہفتہ میں نکال دیئے گئے یہ کہکر کہ آپ اس تخلیقی کام کے قابل نہیں ۔ میں اس ایجنسی کے مالک کی بالغ نظری کو داد دیتا ہوں کہ جس نے میری ناکارگی کو ایک ہفتہ میں جانچ لیا۔ یہ تو اچھا ہوا کہ وہ جلد ہی یہ فیلڈ چھوڑ کر مجھے اوپن فیلڈ دے گئے ورنہ میرا کیریئر بلکہ ہم جیسے مڈل کلاسیوں کا تو سیدھا سیدھا ٹفن کیریئر کہہ لیں ، زیادہ دن چلنے والا نہیں تھا۔ یہاں سے بے آبرو ہو کر نکلے تو ایک ایسی ایچنسی میں جا پہنچے جہاں ہماری ملاقات فاروق پراچہ صاحب سے ہوئی جن کی وجہ سے ہم اخباری آرٹیکلز میں طرف آنکلے ۔ یہاں سے جب ان کا سب سے بڑا کلائنٹ فارغ ہوا تو پھر ہمارے نکالنے کے سارے اقدامات ہوچکے تھے۔ خدا نے عزت رکھی ، بڑا با آبرو اور آدھے ماہ کی تنخواہ چھوڑ کر اعظم شیخ صاحب کی ونگز کمیونیکشنز میں آ لگے۔ یہاں ندیم فاروق پراچہ ہنوز موجود تھے۔ ندیم کے ساتھ بہت اچھا وقت گذرا۔ اپنی سیلانی طبیعت (جو کہ ہماری بھی رہی اور اس فیلڈ میں اکثریت کا خاصا ہے) کے باعث وہ کہیں اور چلے گئے۔
صورتحال یہ بنی کہ یم جنگل میں اکیلے شیر رہ گئے۔ پچھلی ایجنسی میں ہماری حیثیت ٹرینی کاپی رائٹر کی تھی۔ یہاں آئے تو اللہ جانے ایم ڈی صاحب نے ہم میں ایسے کیا گن دیکھے کہ ایک دن ہمیں بلایا اور کہا:
" آج کلائنٹ سے اس کی ایک پروڈکٹ کی بریف لینی ہے"
ہم نے جانا کہ ایم ڈی صاحب یا کلائنٹ سروس کا بندہ ساتھ ہوگا۔ اس لئے کسی قسم کی پریشانی کا اظہار نہیں کیا۔ خیال رہے کہ ہم پہلی مرتبہ کسی کلائنٹ سے ملنے جا رہے تھے۔ایم ڈی صاحب نے وقت بتا دیا جو کہ لنچ کےبعد کا تھا۔ میٹنگ میں ابھی گھنٹہ باقی تھا کہ پیون نے حکم نامہ سنایا "صاحب بلاتا ہے۔" ہم بھاگے ،پہنچے تو گویا ہوئے کہ میں تو ایمرجنسی میں کسی اور کلائنٹ کے پاس جا رہا ہوں ۔آپ اکیلے چلے جائیں۔انہوں نے تو کہہ دیا مگر یہاں تو مارے گھبراہٹ کے پیٹ میں امتحان والی گڑ گڑ شروع ہو گئی۔ سوال جواب کی اجازت نہ تھی۔ خیر ہاتھ میں رائٹنگ پیڈ پکڑ کر وقت مقررہ پر کلائنٹ کے پاس پہنچے۔ یہ ایک بڑی کمپنی تھی۔ ڈائریکٹر مارکیٹنگ سے ملاقات ہوئی۔ بڑے نستعلیق آدمی تھے۔ انہوں نے شیونگ کریم کی ٹی وی کمرشل کی بریف دی اور مارکیٹنگز کی ٹرمز میں ساری گفتگو کرتے رہے ۔ ہم صفر بٹہ صفر جو سمجھ میں آیا لکھتے چلے گئے۔کلائنٹ نے Deadline بھی دے دی۔ آفس آئے بریف کا بتایا ۔ہمارا خیال تھا کہ ہم تو ڈاکیہ تھے۔ بس کام ختم۔ ٹی وی کمرشل کی تو ہمیں الف بے نہ آتی تھی۔ بریف سن کر ایم ڈی صاحب نے کہا :
"بریف لے آئے ہو تو اس پر کام شروع کرو"
ہماری تو آواز حلق میں پھنسی کی پھنسی رہ گئی اور سیٹی کی آواز کے ساتھ صرف جی نکلا جس کا مطلب تھا کہ یہ ہمارے بس کا نہیں لیکن ایم ڈی صاحب نے اس جی کو Yes سمجھا۔ بولے میں بہت مصروف ہوں، لکھو اور کلائنٹ کو بیچ کر آو۔
حکم حاکم مرگ مفاجات اپنی اوقات سے بڑا کام ۔ٹی وی سی (ٹی وی کانسپٹ جس پر اشتہار بنایا جاتا ہے) کیا بلا ہے کوئی تجربہ نہیں تھا ۔ حالات کو دیکھتے ہوئے فورا NBT (نوکری بچاو تحریک) کے سرگرم رکن بن گئے اور لگ گئے کام سے اور ایک الٹا سیدھا کانسپٹ لکھ مارا۔ پہلے سوشل میڈیا تو تھا نہیں کہ کہیں سے چھاپ دیتے۔جو کچھ کرنا تھا عقل سلیم سے کرنا تھا کوئی بتانے والا نہیں تھا ۔ اس موقع پر پہلی ایجنسی والے مالک کا خیال سو بلکہ دو سو فیصد صحیح لگا کہ یہ کام تمہارے بس کا نہیں ۔ ایم ڈی نے پہلے ہی اپنا پتہ کٹا دیا تھا۔ جائیں تو جائیں کہاں ، اپنی آڑی ترچھی بریف پر کام شروع کیا اور وقت مقررہ پر اپنی قربان گاہ یعنی کلائنٹ کے پاس اپنی تیز کی ہوئی چھری (ٹی وی کانسپٹ ) کے ساتھ پہنچ گئے۔ ڈاریکٹر مارکیٹنگ نے پہلے ہمارے ایم ڈی صاحب کے نہ آنے پر اعتراض کیا۔ ہم نے بہانہ کردیا۔ بولے سنایئے ! کیا لائے ہیں ۔ہم اتنے کورے تھے کہ ہمیں کانسپٹ سنانا تک نہ آتا تھا۔ یہاں ہماری ڈیڑھ ہوشیاری کام آئی اور ہم نے محلہ میں جس طرح مزے مزے لے کر اپنا اشتہار سنایا کرتے تھے ، کانسپٹ سنا دیا۔ سناتے ہوئے محسوس ہوگیا کہ پرفارمنس اتنی بری نہیں ۔ کانسپٹ سنکر ڈائریکٹر صاحب کچھ دیر خاموش رہے ۔ہم نے سوچا کہ اب کسی بھی اعلی درجے کی بے عزتی کے ساتھ روانگی کا وقت آگیا ہے لیکن ڈائریکٹر صاحب بولے:
"کانسپٹ تو اچھا ہے ۔کچھ اور لائے ہیں تو وہ بھی سنائیں"
ہمارے پلے کچھ تھا ہی نہیں بھر محلے والی ہوشیاری کام آئی اور کہا کہ ایم ڈی صاحب نے کہا تھا یہ کانسپٹ اتنا Relevant اورTo the point ہے کہ ڈائریکٹر صاحب اس کو One go میں Approve کردیں گے۔ ڈائریکٹر مارکیٹنگ کچھ دیر خاموش رہے۔ہمارا تیر کام کر گیا تھا۔بولے کہ یہ تو خیر آپ ٹھیک کہہ رہے ہیں۔
یم تو بھیا ساتویں آسمان پر چڑھ گئے مگر یہ مت سمجھ لیجئے گا کہ بازی ہمارے ہاتھ رہی۔بولے کتنی دیر کا کمرشل ہے۔ اعتماد تو ہمارا بحال ہوچکا تھا۔ جھٹ بولے "سر 30 سیکنڈ" ڈائریکٹر صاحب نے اپنے ہاتھ کی گھڑی کو دیکھا اور بولے "جیسے ہی چٹکی بجاوں ،آڈیو پڑھنا شروع کردیں۔" یہ کیا ؟ یہ تو ہمیں پتہ ہی نہیں تھا۔ آڈیو پڑھی تو وہ نکلی پورے ڈیڑھ منٹ کی اور ہمارا اعتماد زمیں بوس ہوگیا۔ اب وہ ڈائریکٹر مارکیٹنگ اس دنیا میں نہیں رہے ہیں۔سمجھ گئے کہ میں نیا ہوں۔ بولے"آپ ایک کام کریں کل اس آڈیو کو 30 سیکنڈ کا کر کے لے آئیں۔ جاتے جاتے بولے "اطمینان سے لکھ کر لائیں اور سمجھیں ٹائمنگ والی بات ہوئی ہی نہیں"۔ہم نے سکھ کا سانس لیا۔ خوشی مل بھی تو ادھوری پوری مل جاتی تو آسمان سر پر اٹھا لیتے۔ ایم ڈی صاحب سے اس روز ملاقات نہ ہوئی۔ گھڑی لے کر بیٹھ گئے آڈیو لکھنے ، تب پتہ چلا کہ اگر روانی سے خبروں کی طرح پڑھیں تو ایک سیکنڈ می اوسطا 2 لفظ آتے ہیں۔
خیر دوسرے دن پہنچے۔ لیں جناب زندگی کا پہلا کا نسپٹ تن تنہا Approve کرا لائے۔ایم ڈی صاحب خوش بولے "تم تو بڑے کام کے آدمی ہو۔ تمہارے خیال میں کس کی وائس اوور (پس پردہ آواز) کس کی ہو۔" ہم کسی وائس اوور آرٹسٹ کو نہیں جانتے تھے۔ اداکار طلعت حسین کی آواز کے ہم شروع سے دیوانے تھے اور وہسے بھی 80 کی دھائی میں وہ شہرت کے نصف النہار تھے۔ ہم نے ان کا نام لے دیا۔۔ایم ڈی صاحب نے ہمارا کاندھا تھپتھتائے ہوئے کہا "Good suggestion میں ان سے ریکارڈنگ کا وقت لیتا ہوں "۔یہاں میں نے ایم ڈی صاحب سے درخواست کی کہ سر آپ کا ریکارڈنگ پر ہونا بہت ضروری ہے۔ وہ مان گئے۔ ہم جانتے تھے کہ ریکارڈنگ اسٹوڈیو کی ہم نے شکل نہیں دیکھی تھی اور ہماری کیا اوقات کہ ہم وہ بھی ہم طلعت صاحب کو بتائیں کہ کیسے بولنا ہے ؟
ایم ڈی صاحب نے طلعت صاحب سے بات کی اور سہراب گوٹھ سے زرا آگے ا ٹرنیشنل اسٹوڈیو میں ریکارڈنگ طے پائی۔ یہ وہی اسٹوڈیو تھا جسے ہم نے صرف باہر سے ہی دیکھا تھا۔یار دہے کہ یہ 1988-89 کا زمانہ ہے جب کراچی کے حالات زیادہ خوشگوار نہ تھے۔ طلعت حسین صاحب رات 9 بجے کے آس پاس انٹرنیشنل اسٹوڈیوز پہنچ گئے ۔ انہیں کمرشل دکھا کر پھر اس فریمز اور ٹائمنگ کے لحاظ سے آڈیو کرائی گئی تاکہ با آسانی کمرشل پر بٹھا دیا جائے۔ طلعت حسین صاحب نے دو تین Takes میں کام مکمل کردیا ۔ دل چاہ رہا تھا وہ بولتے ہی رہیں ۔ زندگی میں پہلی مرتبہ ہمیں اپنے لکھے پر پیار آیا۔ اس میں سارا کمال طلعت حسین صاحب کی آواز کا تھا۔
بولتے رہنا کہ کیونکہ تمہاری باتوں سے
لفظوں کا یہ بہتا دریا اجھا لگتا ہے
ہم خاموشی سے ایک کونے میں دبکے کھڑے رہے ۔ہماری خوشی کے لئے یہی بہت تھا کہ ہمارا لکھا طلعت حسین صاحب اپنی کھنکتی شہرہ آفاق انداز میں ادا کر رہے ہیں۔ ہم تو یہ بھی نہیں چاھتے تھے کہ ایم ڈی صاحب ہمارا تعارف کراتے وقت یہی نہ کہہ دیں کہ یہ آڈیو ہم نے لکھی ہے۔امکان یہی تھا کہ ہم خوشی کے مارے کہیں رو ہی نہ پڑتے لیکن ابھی ایک رونا آگے کھڑا تھا۔ اتفاق دیکھیں کہ ریکارڈسٹ محمد علی ہمارے محلہ کا ہی رہنے والا تھا اور لگ رہا تھا کہ طلعت حسین صاحب اسے جانتے ہیں۔ اب آتے ہیں رونے کی طرف۔ طلعت حسین صاحب کے جانے کے بعد جب کمرشل پر آڈیو بٹھانے لگے تو پتہ نہیں محند علی سے کون سا بٹن دب گیا کہ آڈیو ہی غائب ھوگئی۔ بہت ہاتھ پہر مارے محمد علی نے مگر آڈیو ہاتھ نہ آئی۔ دوسرے دن کمرشل کو پی ٹی وی کے سینسر بورڈ سے منظور ہونا تھا۔ پی ٹی وی پر کوئی اشتہار سنسر ہوئے بغیر نہیں چلتا۔ ایم ڈی صاحب کا پارہ چڑ چکا تھا۔ کوتاہی ، غلطی کچھ بھی کہہ لیں محمد علی کی تھی۔ طلعت حسین صاحب کی رہائش شارع فیصل پر عائشہ باوانی کالج کے آس پاس تھی۔اب مسئلہ یہ رات گئے انہیں دوبارہ بلائے کون؟ یہ فریضہ محمد علی کے ذمہ آیا۔ موبائل فون تو تھے نہیں۔ گھر فون کیا ، معذرت کی اور دوبارہ آنے کا کہا۔طلعت حسین صاحب نے پروفیشنل ازم کہہ لیں یا لحاظ کسی پس و پیش سے کام نہ لیا اور آدھے گھنٹے میں دوبارہ اسٹوڈیو آگئے ۔ بس آتے ہی پیار سے محمد علی کے سر پر ہلکی سی چپت لگائی اور کہا "شریر"۔
ممکن ہے طلعت حسین صاحب کو یہ چھوٹا سا واقعہ یاد نہ ہو لیکن میرے لئے تو یہ بڑے قصوں میں آتا ہے۔ گذشتہ سال ایکٹرز اسٹوڈیوز کراچی جہاں میں اسکرپٹ رائٹنگ کی فیکلٹی کا حصہ ہوں کی جانب سے "سنو کہانی" کے عنوان سے اردو کلاسک ادب پڑھا گیا۔ اس پروگرام کی ریہرسل اور پروگرام کے دن کافی دیر ان کی گفتگو میں دیگر افراد کی طرح میں بھی شریک سماعت رہا (بولنے کا یارا کس کو ہے) ۔اس پروگرام کی ہوسٹنگ اور کمپیرنگ میرے ذمہ تھی ۔ میرے ساتھ کو۔ہوسٹ منزہ موتی والا تھیں ۔میں نے اس تمام عرصہ میں طلعت حسین صاحب سے اپنے پہلے ٹی وی کمرشل کی کوئی بات نہیں کی ۔ غالب امکان ہے کہ وہ بھول چکے ہوں گے لیکن میں بھلا کیسے بھول سکتا ہوں طلعت حسین صاحب کو ۔ ویسے بھی آپ ان سے ملیں تو سمچھ لیں آپ ایک بڑے اداکار کے ساتھ ایک وسیع المطالعہ دانشور سے ملنے جا رہے ہیں۔
آدمی آدمی سے ملتا ہے ۔۔۔ دل مگر کم کسی سے ملتا ہے

Client kay qissay ... Mazay mazay kay (2)


Article # 3

(کلائنٹ کے قصے ۔۔۔ مزے مزے کے (2

شیمپو کا ٹی وی اشتہار
اور فیمیل ماڈل کے بال نہ دارد ۔۔۔ بال بال بچ گئے 

تحریر :اظہر عزمی
(ایک اشتہاری کی باتیں)

ایڈورٹائزنگ کی دنیا میں ہماری بھی جان پر بن آتی ہے اور اس وقت امداد غیبی کے علاوہ کوئی چارہ نہیں رہتا۔ ایڈورٹائزنگ سے وابستہ افراد جانتے ہیں کہ کلائنٹ سے کانسپت منظور کرانا کبھی کبھی سوہان روح بن جاتا ہے۔ اگر بریف Focussed اور To the point نہ ہو یا کلائنٹ خود کلیئر نہ ہو تو کریٹیو کی زندگی عذاب میں آجاتی ہے۔ ویسے کلائنٹ سروس کی سکینڈ ہینڈ بریف (میں جسے لنڈا بریف کہتا ہوں) جس میں وہ اپنی ذاتی Creativity کو کلائنٹ کی بنا کر پیش کرتا ہے وہ بھی کام کو ٹریک سے ہٹا دیتی ہے۔
ٹی وی اشتہار کو دیکھنے والے ایک ہی بار میں اشتہار کو پسندیدگی اور نا پسندیدگی کے خانہ میں رکھ دیتے ہیں جو ان کا حق ہے لیکن وہ یہ نہیں جانتے کہ ایک اشتہار کے پیچھے کتنے ہفتے یا مہینے لگے ہوتے ہیں ۔ سب سے پہلے اسٹریٹیجئ آئیڈیئے ،کانسپٹ اور پھر اسٹوری بورڈ ان تمام مراحل کے Pre -Production Meeting جس میں تمام جزئیات یعنی لوکیشن ،ماڈلز کا انتخاب ، ان کا لباس و میک اپ ۔ ماڈلز کا انتخاب کبھی کبھی خون پی جاتا ہے۔ خاص طور پر فیمیل ماڈلز کا انتخاب مشکل ترین ہوجاتا ہے۔ اس کے علاوہ شوٹنگ میں کیا کیا مصیبتیں ہمارے استقبال کے لئے فرش راہ ہوتی ہیں۔ کبھی کبھی تو پکڑے جاتے ہیں اور کبھی جیسا کہ پہلے کہا امداد غیبی ہو جاتی ہے۔
ایک دفعہ کا ذکر ہے (جو کہ کئی دفعہ کا ذکر ہے) ایک شیمپو کا کانسپٹ کلائنٹ نے منظور کر لیا ۔ اب بات چلی شوٹنگ کی جس کے لئے لاہور کے ایک اسٹوڈیو میں کانسپٹ کی مناسبت سے دیو ہیکل دروازے والی کھلی جگہ کا انتخاب کیا گیا۔ آدھا اشتہار پرانے دور اور آدھا نئے دور پر مبنی تھا۔ پرانے دور کے لئے اسٹوڈیو کا انتخاب کیا گیا تھا۔ شوٹنگ میں دو روز رہ گئے تھے مگر پرانے دور کے لئے فیمیل ماڈل فائنل نہیں ہو پارہی تھی۔ ایک دن پہلے میں نے دوپہر میں لاہور ہی کی ایک لمبے بال والی ماڈل منظور کرائی اور شام کی فلائٹ سے عازم لاہور ہوگیا۔
رات میں ڈائریکٹر صاحب کو بتایا کہ یہ ماڈل منظور ہوئی ہے۔ ڈائریکٹر نے Arranger کو لڑکی کا نام بتایا اور کہا کہ صبح شوٹ ہے۔اب دوسری طرف سے Arranger نے بم پھاڑ دیا۔ پتہ چلا کہ تصویر 6 ماہ پرانی ہے اور اب اس لڑکی کے بال بہت چھوٹے ہیں۔ہمارے تو پسینہ چھوٹ چھاٹ گئے۔صبح شوٹنگ اور فیمیل ماڈل کے سر پر بال نہ دارد ۔ طرفہ تماشا جو ہونے والا ہے وہ یہ کہ صبح کلائنٹ شوٹنگ پر تشریف لانے والے ہیں۔ ہم سب کے ہاتھ پیر پھول گئے۔ ڈائریکٹر نے کہا فکر نہ کریں۔ وگ پہنا دیں گے ۔ کمپیوٹر پر ایسی کاریگری کریں گے کوئی پکڑ بھی نہیں پائے گا ۔ میں نے کہا "کلائنٹ شوٹ پر موجود ہوگا اس کی آنکھوں میں دھول کیسے جھنکیں گے؟ "۔ ڈائیریکٹر صاحب نے بڑے سکون سے کہا کہ شوٹنگ آگے بڑھا دیں ۔ ایجنسی یہاں پھنس جاتی ہے۔ شوٹنگ بہانہ کر کے ملتوی کر دیتے اگر کلائنٹ نہ آرہا ہوتا ۔ فیصلہ وگ کے ساتھ شوٹنگ کرنے کا ہوا۔ رات سوچتے سوچتے کٹ گئی۔ ذہن ماڈلز کی زلفوں پر اٹکا رہا ۔ میں آخر تھا تو ملازم ہی بقول جوشش عظیم آبادی:
اے زلف یار تجھ سے بھی آشفتہ تر ہوں میں
مجھ سا نہ کوئی ہو گا پریشان روزگار
صبح ہوئی۔ شوٹنگ میں جگہ جگہ نا گہانی لکھی تھی ۔ ڈائریکٹر صاحب بلا کے ٹھنڈ پروگرام تھے۔ بادشاہوں کے دور کا بازار دکھانا تھا۔انہوں نے رسیاں باندھ کر چادریں لٹکا دیں اور اپنے طور پر بازار سجا دیا۔ جان جل کر رہ گئی لیکن عین وقت پر کوئی بڑی تبدیل ممکن نہیں تھی۔ بازار کے ماسٹر شاٹ کو تبدیل کرنے کا ارادہ کر لیا۔
شوٹنگ سے پہلے کیا دیکھتے ہیں کہ خواتین برقع اوڑھے پھر رہی ہیں۔ میں حیران کہ ان کا یہاں کیا کام ؟ ڈائریکٹر کے اسسٹنٹ سے پوچھا کہ یہ عورتیں یہاں کیوں مٹر گشتی کر رہی ہیں ؟ تو اس نے مٹر گشتی پر ایک نامعقول لطیفہ سنا کر دوستی کرنے کی کوشش کی ۔ میں نے کہا کہ مغلوں کے زمانے تک برقع نہیں آیا تھا۔ پالکی میں خواتین آیا جایا کرتی تھیں۔ اسسٹنٹ نے کہا یہ عورتیں تو خاص طور شوٹنگ کے لئےHire کی گئی ہیں۔ میں نے کہا کہ ان کے برقع اتارو۔اب جو برقع اتارے تو اندر سے مرد برآمد ہوئے۔تو تو میں میں ہو گئی اس غلط بیانی پر لیکن معاملہ رفع دفع ہو گیا۔
مجھے اپنی ہی بات سے یاد آیا کہ بازار تو ادھورا ہے ، پالکی دکھا کر اس زمانے کا تاثر قائم ہوسکتا ہے۔ کوئی بندہ پالکی لانے کو تیار نہیں۔ ڈائریکٹر کی نوابیت قائم و دائم تھی اور ہمارے ہوش وحواس اڑے ہوئے تھے ۔ہم جانتے تھے کہ ڈائریکٹر تو کمرشل دے کر چلا جائے گا اور اگر کلائنٹ نے اس میں تبدیلی کا کچھ کہہ دیا یا یہ کہہ دیا کہ آپ نے جو کچھ کانسپٹ سناتے وقت بتایا تھا اس میں وہ سب کچھ اس میں نہیں تو ایجنسی کو تو لینے کے دینے پڑ جائیں گے۔
کسی نے بتایا کہ اسٹوڈیو کی ایک طرف اداکارہ ریما کے گھر کے قریب پالکیاں شوٹنگ کے لئے کرائے پر ملتی ہیں۔ ہم پہنچے تو وہاں بنا دلہن کے پالکیاں ہی پالکیاں تھیں جو پسند آئی اس کا کرایہ 5 ہزار روپے اور لےجانا لانا ہماری ذمہ داری ۔ اب سوچیں لگ رہا تھا یہ شوٹنگ نہیں ہم شادی کرا رہے ہیں۔ سوزوکی میں پالکی لائی گئی۔
جس سے پالکی لینے گئے وہ بھی پر مزاح شخص تھا۔ میں نے کہا کہ 5 ہزار زیادہ ہیں تو مسکرا کر بولا " 5 ہزار میں ایک 0 بڑھا دین تو دلہن بھی ساتھ دے دیں گے"۔میں نے چڑ کر کہا اور اگر میں 5 ہزار میں ایک 0 کم کردوں تو فورا بولا کہ 2 بندے ساتھ کردوں گا جہاں سے اٹھانا چاھیں اٹھا لیں۔ تھانہ کا خرچہ پانی آپ کی ذمہ واری ۔ میں ایک غیر مانوس شخض سے اس کی حاضر جوابی اور زندہ دلی پر مسکرا کر رہ گیا۔خیر پالکی آگئی یوں سمجھیں کہ پلکی پلکوں پر رکھ کر لایا تھا کیونکہ پالکی والے نے کہہ دیا تھا ٹوٹ پھوٹ آپ کی ذمہ واری ہوگی۔
ماڈل آئی تو اس کے بال گھٹنوں سے نیچے جا رہے تھے۔ جی چاہ رہا تھا کہ نوچ کر پھینک دیئے جائیں۔ وگ تھی کسی وقت بھی پکڑے جا سکتے تھے لیکن کیا کرتے کوئی Option نہیں تھ۔ ساری Arrangements ہوچکی تھیں۔ شوٹنگ کینسل کریں تو خرچہ ڈبل ۔کلائنٹ کو بتائیں تو مصیبت کہے گا کیسے پروفیشنلز ہیں جس ماڈل نے بال کٹوا دیئے وہ approval کے لئے دی ہی کیوں ؟ ایک طرف گھاٹی ہے تو ایک طرف کھائی جوہونے والا ہے اس کا اندازہ سب کو ہے۔
کچھ دیر بعد کللائنٹ آگئے ان کے لئے کرسی میز اور کھانے پینے کا سامان سجا دیا گیا۔ جگہ کافی تھی انہیں شوٹنگ کی جگہ سے اتنا دور بٹھا دیا گیا کہ اصلی اور نقلی بالوں کا فرق پتہ نہ چل سکے۔ کچھ دیر بعد کلائنٹ نے کہا کہ ماڈل کے بال تو بہت گھنے اور بڑے ہیں ۔ ہم بھی تو دیکھیں۔یہ ایک عام سی بات ہے اگر کلائنٹ شوٹنگ پر آئے تو اس کی ڈائریکٹر اور تمام ماڈلز سے ملاقات کرائی جاتی ہے۔ کلائنٹ گھنے لمبے بالوں والی ماڈل کے بال دیکھنا چاھے اور ہم بہانہ پر بہانہ کئے جائیں کہ شوٹ ہو جائے تو ملواتے ہیں۔ ہم جانتے تھے کہ ہونے کیا والا ہے۔ اس روز لاہور کا موسم ہلکا یلکا ابر آلود تھا مگر ہمارا دھیان اس طرف کہاں تھا ۔ جو مینہ ہن پر برسنے والا تھا ہم تو اس کے لئے "جل تو جلال تو آئی بلا کو ٹل تو " پڑھ رہے تھے۔
لائنٹ کا اصرار بڑھتا گیا۔ ہم نے دور سے اسسٹنٹ کو اشارہ کیا کہ ماڈلز کو بھیجو اور جل تو جلال تو پڑھنا شروع کردیا ۔ابھی ماڈلز ایک دو قدم ہی چلے تھے تو یقین جانیں بغیر کسی مبالغہ کے کہہ رہا ہوں کہ موسلادھار بارش شروع ہوگئی۔ کھلی جگہ تھی سب اٹھکر بھاگے۔ پھر کہاں کے ماڈلز اور کہاں کی شوٹنگ۔ کلائنٹ نے پوچھا تو ہم نے کہا کہ بالوں والی ماڈل کے کپڑے اور بال بری طرح بھیگ گئےہیں۔ وہ میک اپ وین میں ہے ۔ بال سکھا رہی ہے۔ کلائنٹ بھی جلدی میں تھے ۔بولے " ٹھیک ہے ملنے کئ کوئی ضرورت نہیں ۔شوٹنگ بہت اچھی جا رہی ہے ۔خاص طور پر ماڈلز کے بال دیکھکر طبیعت خوش ہو گئی " ہم نے کہا "سر سلیکشن تو آپ ہی کی ہے"۔ دیکھا آپ نے کتنی ناگہانیاں ایک شوٹنگ میں آجاتی ہیں۔ ہم نے پروردگار کا شکر ادا کیا کہ بال بال بچ گئے۔ یہ کمرشل ٹی وی پر بہت چلا اور کوئی پکڑ نہیں پایا کہ بال اصلی تھے کہ نقلی ۔۔۔ واقعی جسے اللہ رکھے اسے کون چکھے ۔
لالہ مادھو رام جوہر کا یہ شعر پڑھنے کو بار بار دل چاہ رہے ہے۔ آپ بھی سن لیجئے۔
برسات کا مزہ ترے گیسو دکھا گئے
عکس آسمان پر جو پڑا ابر چھا گئے

Client kay qissay ... Mazay mazay kay (1)


Article # 2


(1)کلائنٹس کے قصے ۔۔۔ مزے مزے کے

پروڈکٹ میں Milk  نام کو نہیں
 لیکن ٹی وی کمرشل میں Milk ہی Milk 


تحریر : اظہر عزمی
(ایک اشتہاری کی باتیں)


ایڈورٹائزنگ کی اصطلاح میں کلائنٹ اس عظیم المرتبت کو کہا جاتا ہے کہ جو اپنے برانڈ یا پروڈکٹ پر کام کرائے (برانڈ اور پروڈکٹ کے فرق پر کبھی بعد میں گفتگو ہوگی)۔ یہ کلائنٹ مالک بھی ہو سکتا اور تنخواہ دار ملازم بھی۔ پاکستان میں ملٹی نیشنل کمپنیز میں تو نہیں لیکن مقامی کمپنز جنہیں میں وطن کی مٹی کی نسبت سے مٹی نیشنل کمپنیز کہتا ہوں ، میں مالک یا ان کی اولادیں ہی فیصلہ سازی کرتی ہیں۔

کبھی کبھی اس ضمن میں بڑے دلچسپ واقعات پیش آتے ہیں جن کو بتانے سے مراد مزاح نہیں ہوتا بلکہ Mindset بتانا مقصود ہوتا ہے۔15 سے 20 سال پہلے ایک مرتبہ کنفیکشنری کے بڑے کلائنٹ نے اپنی نئی پروڈکٹ کے لانچنگ کمرشل کے لئے ہمیں بلایا۔ ہم لاو لشکر کے ہمراہ ان کے دفتر پہنچے۔ اس بار کرم یہ ہوا کہ کلائنٹ ٹی وی کا کانسپٹ منظر بہ منظر سوچے بیٹھا تھا۔ ہمیں صرف منشی گیری کے فرائض انجام دینے تھے۔

کلائنٹ نے سب سے پہلے تو یہ راز آشکارہ کیا ( ویسے انگریزی اردو میں Ask-ara بھی چلے گا) کہ پروڈکٹ میں Milk کے علاوہ کچھ بھی نہیں اور اب انہوں نے اپنا تخلیقی خیال ہم جیسے کم عقلوں کو سنایا۔ بولے گائے کے جسم میں جس طرح دودھ بنتا ہے اور پھر مجتلف پر پیچ راستوں سے ہوتا ہوا بذریعہ تھن باہر آتا ہے۔آپ نے گایے کے اندر دودھ بننے کے عمل پر ہماری پروڈکٹ وہاں دکھا دینی ہے اور پھر یہ دودھ کے ساتھ سفر کرتی گائے کے تھن سے باہر ٹپک پڑے گی۔ میں نے عرض کی کہ یہ عمل غیر فطری ہے اور کسی حد تک نامناسب  بھی لگے گا تو کلائنٹ نے مجھے جاہل جانتے  ہوئے کہا کہ اس سے مراد یہ ہے کہ ہماری پروڈکٹ اتنی خالض ہے جیسے گائے کے تھن سے نکل کر آئی ہے ۔واقعی بات میں دو ڈھائی لیٹر وزن تو تھا۔

کلائنٹ سروس کے بندے نے موقع ملتے ہی ہلکے سے میرے کان میں کہا "فرہاد کے بچے  کلائنٹ دودھ کی نہر بہانے کو نہیں کہہ رہا صرف تھن سے ایک کینڈی ٹپکانے کا کہہ رہا ہے ۔ ویسے بھی Salary لیٹ ملتی ہے۔ اگر یہ کام ہاتھ سے گیا تو سمجھ Salary بھی ہاتھ سے گئی"۔ کلائنٹ سروس کے بندے نے کہا"سر آپ جو بولیں گے وہ ٹپکا دیں گے" ۔اشارہ میری طرف بھی تھا۔ پروڈکٹ کے نام کا پوچھا تو بڑے فخر سے ایک انگریزی زدہ نام بتایا جس سے صاف کسی دوا کی بو آرہی تھی۔ میں نے کہا کہ یہ نام دوا کا تاثر دے گا۔بولے نام اور کانسپٹ تو یہی رہیں گے۔اچھا چلو اس سے بہتر نام اور کانسپٹ لے آو۔ کلائنٹ سروس کا بندہ سمجھ گیا تھا کہ صاحب ہتھے سے اکھڑ رہے ہیں۔ بولا سر دونوں چیزیں Ultimate ہیں۔ اس سے اچھی ہو ہی نہیں سکتیں۔ صاحب نے اتنا ضرور لحاظ کیا کہ پروڈکٹ کے نام کے آخری Alphabet سے پہلے( ' ) لگانے کی اجازت مرحمت فرما دی۔

دوران گفتگو انہیں نہ جانے کیا خیال آیا ۔ہمارے سامنے موبائل سے کال کی اور  فیکڑی میں بڑے یقین سے پوچھا کہ اس پروڈکٹ میں دودھ کے علاوہ کیا ہے۔ دوسری جانب سے کیا جواب آیا وہ تو ہم نہ سن پائے البتہ صاحب نے کسی قدر حیرانگی سے اونچی آواز میں کہا "کیا مطلب اس میں دودھ نہیں ہے؟ "۔ ہم مطمئن چلو اب ہم کو ہی سوچنا پڑے گا لیکن ابھی یہ سوچ ہی رہے تھے کہ صاحب نے بڑے یقین اور طمطراق سے کہا کہ دودھ تو اس میں نہیں لیکن ایڈ یہی بنے گا اور پھر  ٹی وی سی ویسے کا ویسا ہی بنا اور پروڈکٹ ویسی کی ویسی ہی چلی ۔ کچھ عرصہ بعد بند ہوگئی۔ ممکن ہے گائیوں کے باڑے سے صدائے احتجاج بلند ہوئی ہو کیونکہ ہماری آواز تو صدا بہ صحرا ثابت ہوئی تھی۔


Advertising mein aana kaisay hoa? ep.1 (An autobiograpbhy of a Creative)


Article #1


ایڈورٹائزنگ میں آنا کیسے ہوا ؟
اشتہارات ہیں زمانہ کے !
قسط اول



تحریر :اظہر عزمی

لکھنے کا مرض بچپن میں لگ گیا تھا۔ پانچویں یا چھٹی جماعت میں تھے تو اس کی علامات ظاہر ہو گئیں۔ والد صاحب کوثر سلطان پوری ، رحمن برادرس میں دیگر اداروں کی طرح اکاونٹس کے معاملات دیکھا کرتے تھے ۔ ان کے یہاں سے بچوں کا ماہنامہ رسالہ غنچہ نکلا کرتا ہے۔ والد صاحب کو بغیر بتائے اپنے چچازاد بھائی اطہر نجمی (جو اب آسودہ خاک ہیں) کی شرارتوں پر ایک مضمون "استاد شرارت" لکھا ۔والد کو دکھایا اور وہ چھپ گیا۔ ایک دو اور مضمون لکھے تو طبعیت میں افاقہ ہوا اور اس مرض سے وقتی نجات ملی۔ یہ لکھائئ کا مرض بھی عجب ہے ۔ میرے ساتھ تو یہ ہے کہ لکھ لو تو طبیعت سنبھل جاتی ہے۔
وقتا فوقتا جہاں جس نے موقع دیا ہاتھ صاف کرتے رہے۔ کسی نے کوئی کتابچہ لکھوالیا،کچھ نہیں تو کسی کی سالگرہ پر چند لکیریں کھینچ دیں۔ کسی کا انتقال ہوا تو سوگوارن کے کہنے پر مرحوم کی روانگی کو سانحہ عظیم قرار دے دیا ۔ ہماری اخباری لکھت اور خبریں ترجمہ کرنے اور لکھنے کی ابتدا مولانا جواد الاصغر کی زیر ادارت نکلنے والے ہفت روزہ "ارشاد" سے ہوئی جو 80 کے اوائل میں خادم حسین کے زیر انتظام نکلا کرتا تھا بعد ازاں یہ ذمہ داری ان کے داماد جعفر امام نے سنبھال لی۔ ایک مرتبہ ایک سیاسی پوسٹر لکھنے کا موقع بھی ملا لیکن جب وہ پوسٹر دیواروں پر چسپاں ہوا تو ڈر گئے ۔ ہمارے چھوٹے بھائی وجاہت عباس (بزمی) کے ایک دوست اسد نقوی ضیا مخالف جماعت یقینا پیپلز پارٹی ہی تھی ،میں تھے۔ان کے ایک سیاسی رہنما پابند سلاسل تھے ہم سے ان کی رہائی کے لئے پوسٹر لکھنے کو کہا ۔ہمارا خیال تھا کہ چھپنا وپنا ہے نہیں لکھدیا ۔اس میں لکھے دو اشعار آج بھی ذہن میں ہیں۔اللہ جانے کس کے ہیں ؟
جذبات کے اظہار پہ پہرے نہ بٹھاو
خاموش رہو گے تو گھٹن اور بڑھے گی
گو منزل مقصود ابھی دور ہے لیکن
رک جائے مسافر تو تھکن اور بڑھے گی
اب آتے ہیں کہ یہ Passion ہمارا Profession کیسے بنا ؟ 1988 کے شروع کے مھینے ہیں۔ محلہ میں ایک کونے کے گھر میں اسحاق صاحب کی دکان تھی ۔اس کے ساتھ پیپل کے درخت کے نیچے بے روزگار People بیٹھتے ہیں۔ جن کا کام سیاسی صورت حال پر بے راگ تجزیئے کرنا ، ٹھٹول بازی کرنا (شائستگی کے دائرے میں) اور یہ خبر رکھنا کہ کون سا لڑکا چھٹی کے وقت کس لڑکی سے 20-25 قدم دور اپنے حصار میں لے کر اسے بغیر بتائے گھر تک بہ حفاظت چھوڑ کر آتا ہے ۔ یہ "ہمارے زمانے کے " شریفانہ عشق ہوا کرتے تھے جس میں پہلا فریضہ شیریں کی گھر تک بہ حفاظت سپردگی شیوہ عاشقاں تھی۔
ہماری زندگی 1982 سے ساڑھ ستی کا شکار تھی ۔یہ ہم نہیں ہمارے ایک دوست ہماری حالت دیکھکر کہا کرتے تھے۔ ہمیں خود بہت بعد میں پتہ چلا کہ یہ کیا بلا ہے۔ سمجھ لیں تعلیم ہو روزگار سب دروازے مقفل اور ہم آئے دن دو چھتی والے کمرے میں جا کر اللہ تعالی سے اپنی قسمت کے شکوے کیا کرتے ۔اکثر یہ شعر پڑھتے :
مجھ کو شکوہ تو نہیں کاتب تقدیر مگر
رو پڑے تو بھی اگر میرا مقدر دیکھے
صورت حال مرزا غالب کے اس مصرعہ تک پہنچ چکی تھی
مقدور ہو تو ساتھ رکھوں نوحہ گر کو میں
ڈانٹ پھٹکار اور ناکارگی کے طعنے سنتے سنتے 1988 آگیا۔ ملک میں جنرل ضیاءالحق کا مارشل لا اور ہمارا آسٹرولوجیکل مارشل لا جاری تھا۔ 1977 کی بھٹو مخالف تحریک میں جب ہم اسکول میں پڑھا کرتے تھے لیکن سیاسی باخبری کی لت پڑوس میں رہنے والے حسن بھائی سے لگ چکی تھی۔ اس زمانے میں علاقائی سطح پر فملی انداز کے پی پئ پی کے رہنماوں کے اشتہار ت فوٹو کاپی کر کے چسپاں کر دیئے جاتے جو بالکل ایک نیا آئیڈیا تھا۔
یہ بات 1988 تک ہمارے ذہن میں تھی ہمارے پڑوس میں ایک صاحب PQR (پاکستان قومی رضاکار) میں ہوا کرتے تھے۔ ان سے ہمارا ہنسی مذاق چلتا رہتا تھا۔ ایک دن کسی بہانے سے ان کی اور ایک دو اور لڑکوں کی پاسپورٹ سائز تصویریں لیں۔ اخبار جنگ کے فلمی صفحہ سے اداکار اور اداکاروں کی تصویر لیں، ان کے سر کاٹے ( تصویر سے ) اور جوڑ جاڑ کر ایک مزاحیہ فلمی اشتہار بنا دیا۔ اس کا ایک جملہ مجھے ابھی بھی یاد ہے : یہ اس وقت کی کہانی ہے جب پیاز مہنگی اور خون سستا تھا۔ لیجئے جناب اشتہار تیار ہوگیا۔ فوٹو کاپی ہوئی اور محلہ کی سب سے چلتی ہوئی اسحاق صاحب کی دکان پر لگا دیا۔ اشتہار کا واحد مقصد تفریح اور جن کی تصویریں اس اشتہار میں ہیں ان سے نہاری کھا کر اوریجنل اشتہار پھاڑ دینا ہونا تھا۔ اشتہار دوپہر میں لگا اور ہماری تقدیر کا فیصلہ ہونے میں چند گھنٹے رہ گئے۔
اسحاق صاحب کی دکان کے بالکل سامنے ہمارے عزیز ترین دوست صفدر مرزا رہا کرتے تھے ۔ان کے والد جنہیں ہم خالو کہا کرتے تھے (ہمارے زمانہ میں کسی سے بھی آنٹی انکل والی رشتہ داری کا رواج قائم نہ ہوا تھا ۔ننھیالی رشتہ داری باعث تعظیم تھی ) چغتائی آرٹ کے مصور تھے اور کسی جگہ ملازمت کیا کرتے تھے۔ اس سے زیادہ ہمیں کسی معلومات کی ضرورت بھی نہیں تھی۔ جب کبھی صفدر مرزا کو بلاتے اور اگر وہ نکل آتے تو سلام کے بعد کہتے " خالو صفدر کو بھیج دیں۔ صفدر مرزا کے والد کا نام دلاور مرزا تھا۔ مرزاصاحب کا یہ تھا کہ شام کو دفتر سے آکر اپنے بڑے بیٹے کے بچوں یعنی پوتوں کے لئے بسکٹس وغیرہ لینے آتے۔اس دن بھی آئے لیکن تاریخ بتاتی ہے کہ وہ ہمیں لینے آئے تھے۔ دکان پر آئے ایک نظر ہمارے اشتہار کو دیکھا اور اسحاق صاحب سے پوچھا کہ یہ کس نے بنایا ہے۔ اسحاق صاحب ہماری اس حرکت پر خوش نہ تھے لیکن محلہ کی دکانداری کی وجہ سے خاموش تھے ،بولے "ارے مرزا صاحب یہ وہی عزمی ہے۔ایسی حرکتیں اس کے علاوہ کون کرتا ہے "۔مرزا صاحب نے جاتے جاتے کہا کہ وہ آئے تو میرے پاس بیھجنا ۔
ہم دکان پر پہنچے تو اسحاق صاحب نے بڑے طنز بھرے لہجہ میں کہا "جاو ،مرزا صاحب بلا رہے ہیں "۔انہوں نے اشتہار کا ذکر نہیں کیا۔ ہم سمجھے کہ ہماری کوئی شکایت ہوگی۔ ہم صفدر مرزا کے پاس گئے اور پوچھا "او ۔۔۔ بھائی خالو نے بلایا ہے ۔میں نے تو کچھ بھی نہیں کیا "۔ صفدر مرزا نے کہا کہ ابو تو اندر بیٹھے چائے پی رہے ہیں مجھ سے تو انہی نے تمہارا کوئی ذکر نہیں کیا۔ ہم باتیں ہی کر رہے تھے کہ خالو خود باہر آگئے۔ہم ڈر گئے۔ سلام کیا اور سوچا کہ اب کچھ ہوا۔خالو نے دکان پر لگے اشتہار کی طرف اشارہ کر کے پوچھا "یہ تم نے بنایا ہے ؟"۔ میں نے ڈرتے ڈرتے ہاں میں سر ہلایا۔ بولے " کل صبح ٹھیک ساڑھے آٹھ بجے میرے ساتھ میرے آفس چلنا "۔ ہم نے جانا کہ ملازمت کے آثار ہویدا ہوئے ۔
یہ بات سنکر گھر دوڑے گئے تو گھر میں خوشی کی لہر دوڑ گئی۔صبح کی تیاری رات کو ہی شروع ہو گئی۔ عید پر سلی پینٹ اور شرٹ نکالی گئی۔ استری ہوئی۔ امی نے دس بجے ہی یہ کہکر حوالہ بستر کردیا کہ تم تو شروع کے نیستی مارے ہو کہیں صبح سوتے ہی نہ رہ جانا۔ والد صاحب نے کہا "صاحبزادے آپ گھوڑے بیچ کر سوتے ہیں ۔جلدی سو جائیں"
اگلے روز 7 بجے اٹھ گئے ۔ نہائے دھوئے ۔لکھتے لکھتے واصف علی واصف کا یہ شعر یاد آرہا ہے۔
نہ جانے کون سی منزل ہے واصف
جہاں نہلا کے بلوایا گیا ہوں
دلچسپ بات یہ ہے کہ جا تو رہے ہیں مگر یہ خبر نہیں کہ کام کیا کرنا پڑے گا۔ بھائی اتنی مصیبتیں گلے پڑ جکی تھیں کہ کچھ بھی کرنے کو تیار تھے۔ بقول شخصے کسی موذی مرض کا شکار بخار کو صحت یابی سمجھتا ہے۔ قصہ الطویل خالو وقت مقررہ پر گھر سے برآمد ہوئے تو ہم ان کے گیٹ کے باہر موجود تھے۔ان کی ویسپا موٹر سائیکل پر بیٹھے اور شاہراہ فیصل پر موجودہ مہدی ٹاورز کے ساتھ پیٹرول پمپ کے پیچھے ایک بنگلے میں ویسپا پارک کر دی گئی ۔معلوم ہوا کہ یہ ایک ایڈورٹائزنگ ایجنسی ہے اور خالو (یہاں مرزا صاحب) آرٹ ڈائریکٹر ہیں۔
مرزا صاحب کے ساتھ ساتھ چلتے چلتے ایک کمرے میں پہنچے جہاں کوئی بخاری صاحب موجود تھے مرزا صاحب نے ان سے خاصی بے تکلفی سے بات کرتے ہوئے کہا "بخاری صاحب اس بچے سے ملو ،دل خوش ہو جائے گا۔ بہت کریٹیو ہے"۔اللہ جانتا ہے مجھے کریٹیو لفظ کا اس موقع پر استعمال بالکل پلے نہ پڑا ۔ مرزا چلے گئے اب ہم اور بخاری صاحب ۔کچھ گھر اورتعلیم کا پوچھا اور پھر ٹیبل سے ایک پن اٹھا کر ہاتھ میں دے دی اور بولے "اس پن کے الٹے سیدھے تمہارے ذہن میں جو بھی استعمال آئیں وہ لکھ دو۔ ہمارے تو دماغ میں پن چبھ گئی کہ یہ کہاں آگئے۔کیا یہ لوگ پنوں کا کاروبار کر رہے ہیں اور اسکی فروخت بڑھانے کے لئے ہمیں ملازم رکھ رہے ہیں۔ ہماری خاموشی دیکھکر بخاری صاحب بولے " میاں لکھ لو گئے۔مرزا صاحب تو بڑی تعریف کر گئے ہیں" ۔ مرزا صاحب پر حرف آتے دیکھا تو پھر ہم نے آو دیکھا نہ تاو۔وہ وہ استعمال لکھے کہ چند ایک تو یہاں لکھنے کے قابل بھی نہیں۔بخاری صاحب کو بہت مختصر وقت میں ایک طویل فہرست تھما دی گئی۔ بخاری صاحب نے فہرست پڑھی اور مسکرائے ۔مرزا صاحب کو بلایا ،ہاتھ ملایا اور کہا "مرزا صاحب یہ چلے گا نہیں دوڑے گا گھوڑے کی طرح " ہمیں ایک دم رات والی والد صاحب کی بات یاد آئی " صاحبزادے آپ گھوڑے بیچ کر سوتے ہیں " مگر ہمیں تو اب دوڑنے والا گھوڑا قرار دیا جا چکا تھا .نوکری ہھر بھی نہیں ملی ۔ابھی ٹھوکریں باقی تھیں۔ 

باقی قسط نمبر 2 میں پڑھیں جو اس بلاگ پر موجود ہے  تیسری قسط ابھی آنا باقی ہے۔۔باقیآئد

عمر بڑھ جائے تو ایک محترمہ سے بچ کر رہیں . Article 91

Article # 91 رنج و مزاح  عمر بڑھ جائے تو ایک محترمہ سے بچ کر رہیں  تحریر : اظہر عزمی ہمارے ایک دوست بہت دلچسپ ہیں ۔ گفتگو میں آخر تک تجسس و ...